زێڕ و زیو ڕوویان لە بەرزبوونەوە کردەوە

​ئەمڕۆ شەممە، 27ـی حوزەیرانی 2026، بازاڕەکانی کانزا گرانبەهاکان لە کاتی داخستنی هەفتانەیاندا گۆڕانکاریی نوێیان بەخۆوە بینی و دوای ئەو پاشەکشە توندەی لە چەند ڕۆژی ڕابردوودا تۆماریان کردبوو، نرخەکان لەسەر ئاستی جیهانی و بازاڕەکانی ناوخۆدا دووبارە ڕوویان لە بەرزبوونەوە کردەوە.

​لە بازاڕە جیهانییەکاندا، نرخی یەک ئۆنسە زێڕ گەیشتەوە بە 4,088.39 دۆلار، یەک کیلۆگرام بە 131,444.63 دۆلار و یەک گرامیش بە 131.44 دۆلار مامەڵەی پێوە دەکرێت.

​هاوکات لە بازاڕەکانی ناوخۆشدا و بەپێی نوێترین نرخی فەرمی سەندیکای زێڕنگران، عەیارەکان بەهایەکی بەرزتریان تۆمارکرد و زێڕی عەیارەی 21 چووەوە سەرووی 900 هەزار دینار؛ عەیارەی 22 بە 944,054 دینار، عەیارەی 21 بە 901,142 دینار و عەیارەی 18ـیش بە 772,408 دینار مامەڵەی پێوە دەکرێت.

​لەلایەکی دیکەوە، بازاڕی زیویش هاوشێوەی زێڕ جووڵەی بەخۆوە بینی، بە جۆرێک لە ئێستادا نرخی هەر ئۆنسەیەک زیو گەیشتووەتە 59.21 دۆلار، هەر کیلۆگرامێک بە 1,903.77 دۆلار مامەڵەی پێوە دەکرێت و نرخی هەر گرامێکیش لەسەر 1.9 دۆلار جێگیر بووە.

​شارەزایانی دارایی ئاماژە بەوە دەکەن، سەرەڕای ئەم سەرکێشییە کاتییەی نرخەکان، بازاڕەکان هێشتا لەژێر کاریگەریی چاوەڕوانییە توندەکانی تایبەت بە سیاسەتی نەختیی ئەمریکادان، بە تایبەت دوای ئەو ئاماژانەی لەلایەن بانکی ناوەندیی ئەمریکاوە فیدراڵ ڕیزێرف دراون سەبارەت بە ئەگەری بەرزکردنەوەی ڕێژەی سوودی بانکی لە کۆتایی ئەمساڵدا.