ویلایەتی کالیفۆرنیا بە فەرمی بڕیاری دا رۆژی 17ی ئایار وەک “رۆژی بروس لی” دیاری بکات، ئەم هەنگاوە بە فەرمانی پارێزگاری ویلایەتەکە، گاڤین نیوسۆم، جێبەجێ کرا.
بەم بڕیارەیش، بروس لی دەبێتە یەکەمین هاووڵاتیی ئەمریکی لە رەگەزی چینی کە لە مێژووی ئەم ویلایەتەدا رۆژێکی فەرمی بە ناوی خۆیەوە بۆ تەرخان بکرێت.
ئەم یادکردنەوەیە تەنیا رێزلێنانێکی ئاسایی نییە لە کەسایەتییەکی وەرزشی و سینەمایی بەناوبانگ، بەڵکو دانپێدانانێکی دامەزراوەیی و مێژووییە بۆ خەبات و بەرهەڵستکارییەکانی ئەم ئەستێرەیە بەرامبەر بە پەراوێزخستنی رەگەزی و نەتەوەیی.
بروس لی لە ساڵانی پەنجا و شەستەکانی سەدەی رابردوودا، لە ناو جەرگەی هۆڵیووددا رووبەڕووی چەندین ئالنگاری گەورە بووەوە.
لەو سەردەمەدا، سینەمای ئەمریکی بەردەوام رووخسارێکی نەرێنی و پەراوێزخراوی لەبارەی ئاسیایییەکان نیشان دەدا و رۆڵی خزمەتکار یان تێکدەر و شەڕانگێزی پێ دەسپاردن. تەنانەت کاتێک بروس لی لە زنجیرەی ناوداری “The Green Hornet” بە رۆڵی “Kato” درەوشایەوە، کۆمپانیا گەورەکان بەهۆی ڕەگەزەکەیەوە رەتیان کردەوە رۆڵی سەرەکی پێ ببەخشن.
ئەم ئاستەنگانە ورەی ئەو پیاوەیان دانەبەزاند، بەڵکو هانیان دا بگەڕێتەوە بۆ هۆنگ کۆنگ و لەوێ شۆڕشێکی نوێ لە سینەمای هونەرە بەرگرییەکاندا بە فیلمەکانی وەک “The Big Boss” و “Fist of Fury” بەرپا بکات، کە بەردەوام وەک ناوەند و قارەمانی سەرەکی چیرۆکەکان دەردەکەوت.