هونەرمەند فەزڵ شاکر دوای ئازادکردنی لەسەر دادگاییکردنی سەربازی، وڵاتی لبنانی جێهێشت و گەیشتە دەوحەی پایتەختی قەتەر.
لەم گەشتەدا کوڕەکەی موحەممەد فەزڵ شاکر و کچەکەی ڕەنا و کۆنسوڵی قەتەر لە بەیروت شێخ سەعود بن عەبدولڕەحمان ئال ثانی یاوەری بوون.
بڕیارە ئەم هونەرمەندە لە قەتەر بمێنێتەوە و لەوێ چارەسەری پزیشکی وەربگرێت و حکومەتی قەتەریش تەنیا سەرپەرشتی کاروباری نیشتەجێبوونی دەکات.
فەزڵ شاکر بە پاسپۆرتێکی لبنانی ڕۆشت کە لە هەمان ڕۆژدا بۆی دەرکرابوو. ڕەخنەگری هونەری جەمال فەیاز ڕایگەیاند، فەزڵ شاکر پێشتر لە ناوچەی یەرزەی لبنان لەژێر پاراستنی ئەمنی باڵیۆزخانەی قەتەردا بووە و دەست بە ڕێوڕەسمی وەرگرتنی ڕەگەزنامەی قەتەری دەکات.
جەماوەرەکەی بەردەوام چاوەڕێی گەڕانەوەی دەکەن بۆ کارە هونەرییەکان و بڕیارە یەکەم ئاهەنگی جەماوەریشی لە شاری ڕیاز لە شانشینی عەرەبی سودیە بێت.