تێرێنس ستامپ کۆچی دواییکرد

بنەماڵەی ئەکتەری ناسراوی بەریتانی، تێرێنس ستامپ، رایانگەیاند، ناوبراو لە تەمەنی ٨٧ ساڵیدا کۆچی دوایی کردووە. 

ستامپ، کە بە رۆڵی کاریزمایی جەنەڕاڵ “زۆد” لە فیلمەکانی “سوپەرمان” و “سوپەرمان ٢”دا ناوبانگێکی جیهانیی بەدەستهێنا، یەکێک بوو لە دیارترین سیماکانی سینەمای بەریتانیا.

ئەو لە ماوەی کاروانی هونەریی درێژیدا، کە پاڵێوراو بوو بۆ خەڵاتی ئۆسکار، بەشداریی لە دەیان فیلمی جۆراوجۆردا کردووە، لەوانە فیلمی “Theorem”ی دەرهێنەر پازۆلینی و فیلمی “The Adventures of Priscilla” کە تێیدا رۆڵێکی بوێرانەی وەک ژنێکی ترانسجێندەر گێڕا. 

ستامپ لە ساڵی ١٩٣٨ لە خێزانێکی سادە لە لەندەن لەدایکبووە و لە شەستەکانی سەدەی رابردوودا وەک ئەستێرەیەکی گەنج دەرکەوت. بنەماڵەکەی لە بەیاننامەیەکدا رایانگەیاندووە: “میراتێکی هونەریی نایابی لەدوای خۆی جێهێشتووە کە دەبێتە سەرچاوەی ئیلهام”.