لە چوارچێوەی چالاکییە ڕۆشنبیری و هونەرییە بەردەوامەکانیدا، ئینستیتیوتی داکۆ بۆ گەشەپێدانی هونەر و کولتوور، کۆڕێک بۆ هونەرمەند دیاری قەرەداغی لەژێر ناونیشانی “لە گۆرانیدا” ڕێکدەخات.
کۆڕەکە تیشک دەخاتە سەر بەهاکانی دەق، شوناس، بیرەوەری و جەنگی تاریکی لە کارە هونەرییەکانیدا، کە بڕیارە ئەمڕۆ سێشەممە، ١٩ی ئایاری ٢٠٢٦، کاتژمێر ٤:٣٠ی ئێوارە بەڕێوەبچێت.
دیاری قەرەداغی تەنیا گۆرانیبێژێک نییە، بەڵکو یەکێکە لەو دەنگ و سیمایە دیارانەی کە لە کۆتاییەکانی سەدەی ڕابردووەوە تاوەکو ئێستا، توانیویەتی پێگەیەکی تایبەت بە خۆی لە موزیک و گۆرانیی کوردی هاوچەرخدا بنیاد بنێت.
بە پێچەوانەی شەپۆلە بازرگانییەکان، بەرهەمەکانی دیاری قەرەداغی بەردەوام هەڵگری پەیامی قووڵی مرۆیی، نیشتمانی و کۆمەڵایەتین. ئەو گرنگییەکی بێوێنە بە دەق دەدات، تێیدا ڕەنگدانەوەی ئازارەکان، بیرەوەرییەکان و مێژووی هاوچەرخی گەلی کورد دەبینرێت.
وەک لە ناونیشانی کۆڕەکەشدا ئاماژەی پێکراوە “جەنگی تاریکی”، هونەری ئەو بەردەوام ئامرازێک بووە بۆ بەرەنگاربوونەوەی نائومێدی، شەڕ و تاریکپەرستی، و ڕێگەیەک بووە بۆ چاندنی هیوای گەش لە نێو دڵی بیسەراندا.
دیاری قەرەداغی لە ماوەی کاروانی هونەری خۆیدا چەندین ئەلبوم و کلیپی سەرکەوتووی بڵاوکردووەتەو، زۆربەیان بوونەتە بەشێک لە بیرەوەریی کۆمەڵایەتی خەڵک وەک گۆرانییەکانی “ماڵئاوا”، “سەفەر” و چەندین کاری دیکە.
ئەم کۆڕەی ئینستیتیوتی داکۆ، دەرفەتێکە بۆ گەشتکردن بە ناو جیهانبینیی ئەم هونەرمەندە و شیکردنەوەی ئەو ڕەهەندە شاردراوانەی کە موزیکی ئەویان لەسەر بنیاد نراوە و نیشاندانی ڕێزێکە بۆ ئەو تەمەنەی کە لە پێناو بەرەوپێشبردنی کولتوور و هونەری کوردیدا بەخشیویەتی.