ئەمڕۆ شەممە، 5ی ئەیلوولی 2026، لە کاتی داخستنی مامەڵەکانی کۆتایی هەفتە لە بازاڕەکانی وزەدا، نرخەکانی نەوت لە جیهاندا ڕوویان لە هەڵکشان کردەوە و بەشێک لە پاشەکشەکەی ڕۆژانی پێشوویان قەرەبوو کردەوە.
ئەم بەرزبوونەوە نوێیەی نرخەکان لە کاتێکدایە کە سەرەڕای لێدوانە دڵنیاکەرەوەکان سەبارەت بە کورتخایەنبوونی هەڵمەتە سەربازییەکان، هێشتا ئاڵۆزی و گرژییە کردارییەکان لە تەنگەی هورمز لە نێوان ئێران و ئەمریکادا بەردەوامن. ترسی وەبەرهێنەران لە ئەگەری ڕوودانی هەر ئاستەنگێکی چاوەڕواننەکراو لە ڕێڕەوی گواستنەوەی خاو، جارێکی تر فشاری خستووەتەوە سەر نرخەکان.
لە گۆڕانکارییەکانی دواین ئاماری بازاڕدا، نرخی هەر بەرمیلێک نەوتی خاوی برێنت ڕووی لە بەرزبوونەوە کرد و گەیشتە 96.28 دۆلار، کە بەراورد بە ئاماری پێشوو (94.71 دۆلار) بە بڕی 1.57 دۆلار هەڵکشاوە. هاوكات، نرخی هەر بەرمیلێک نەوتی خاوی سووکی تەکساسی ئەمریکیش بە هەمان ڕێڕەودا بەرزبووەوە و نیشتەوە سەر 91.48 دۆلار، کە بەراورد بە ئاماری پێشوو (90.38 دۆلار) بەرزبوونەوەیەکی 1.10 دۆلاری نیشان دەدات.
ئەم هەڵکشانەی کۆتایی هەفتە دەریخست کە باری ئەمنی و جیۆپۆلیتیکی لە تەنگەی هورمز هێشتا کارئەکتەری سەرەکیی دیاریکردنی ئاراستەی نرخەکانە و ڕێگە لە دابەزینی بەردەوامی نەوت دەگرێت.