کارەکانی دروستکردنی نەخۆشخانەی 150 قەرەوێڵەیی تایبەت بە نەخۆشییەکانی شێرپەنجە لە شاری هەولێر، کە بەردی بناغەکەی پێشتر لەلایەن ڕێزدار مەسرور بارزانی، سەرۆکی حکوومەتی هەرێمی کوردستانەوە دانرا، بە ڕێژەی 80٪ تەواو بووە و پڕۆژەکە چووەتە قۆناغی کۆتایی جێبەجێکردن.
ئەم پڕۆژە تەندروستییە بە شێوازێکی هاوچەرخ دیزاین کراوە و توانای پێشوازی لە نزیکەی 1000 نەخۆش ڕۆژانە لە بەشی ڕاوێژکاریدا دەبێت.
نەخۆشخانەکە بە ئامێر و پێداویستییە پزیشکییە پێشکەوتووەکان تەیار دەکرێت و خزمەتگوزارییەکانی چارەسەری کیمیایی، تیشکی، سەنتەری تیشکی لیناک (LINAC)، هۆڵەکانی نەشتەرگەری، بەشی خەواندن و فریاکەوتن لەخۆدەگرێت.
بە تەواوبوونی پڕۆژەکە و دەستپێکردنی کارەکانی، چاوەڕوان دەکرێت خزمەتگوزارییەکانی چارەسەری شێرپەنجە لە هەرێمی کوردستان بەرەوپێشچوونی زۆر بەخۆیەوە ببینێ.