ئەڤرۆ رۆژا دووشەمبی، ١٠ی تەباخا ٢٠٢٦، مەکتەبا رێکخستنا پارتی دیموکراتی کوردستان ل پارێزگەها دهۆکێ، د رێوڕەسمەکا تایبەت دا و ب پشتەڤانیا دارایی یا ڕێزدار ئیدریس نێچیرڤان بارزانی، خەلات ل سەر ٦٨ قوتابیێن پلەبڵندێن سەر ئاستێ دهۆک و ئیدارا سەربەخۆیا زاخۆ دابەش کرن.
رێوڕەسم ب سەرپەرشتیا ڕێزدار سەربەست لەزگین، ئەندامێ مەکتەبا سیاسی و بەرپرسێ مەکتەبا رێکخستنا پارتی، و ب ئامادەبوونا ڕێزدار مەھدی مزووری، نوێنەرێ نڤێسینگەھا جێگرێ سەرۆکێ پارتی دیموکراتی کوردستان بڕێوەچوو.
“قوتابی جهێ شانازیا نیشتمانینە”
د پەیڤەکێ دا، سەربەست لەزگین پیرۆزباهی ل قوتابیێن سەرکەفتی و مالباتێن وان کر و ڕایگەهاند: “ئەڤ قوتابیێن ئەڤرۆ لێرە هاتینە خەلاتکرن، جهێ شانازیا مەزن یا مە و تەڤایا کەس و کارێن خۆنە. پشتەڤانیکرنا خودان شیانان ئەرکەکێ سەرەکی یێ پارتی دیموکراتی کوردستانە.” هەروەسا سوپاسیا ڕێزدار ئیدریس نێچیرڤان بارزانی کر بۆ پشتەڤانیا وی یا بەردەوام بۆ تەخا قوتابیان.
زانکۆ و ئاڤاکرنا کەسایەتیێ
بەرپرسێ مەکتەبا رێکخستنا پارتی تیشک خستە سەر قۆناغا نوی یا ژیانا قوتابیان و گۆت: “زانکۆ ب تنێ جهێ وەرگرتنا باوەرنامێ نینە، بەلکو بناغەیەکێ سەرەکی یە بۆ ئاڤاکرنا کەسایەتیا مرۆڤی و گەشەپێدانا جڤاکی.” وی داخواز ل قوتابیان کر کو پێگەهاندنا زانستی و فکری بکەنە ئارمانجا خۆ یا سەرەکی.
مێژووا پارتی و گرنگیدان ب زانستێ
سەربەست لەزگین د بەشەکێ دی یێ ئاخفتنێن خۆ دا ئاماژە ب مێژووا خەباتا پارتی دا و دیار کر کو پارتیا وان چ د سەردەمێ شۆڕشێ دا ل شکەفتان و چ د کەمپێن ئاوارەیێ دا، چ دەمەکێ دەست ژ پەروەردەکرن و خواندنێ بەرنەدایە و هەمبەر زانست و زانینێ خودان هەلوەست بوویە.
هۆشداری ل دۆر تۆرێن جڤاکی
ل دووماهیا رێوڕەسمێ، بەرپرسێ مەکتەبا رێکخستنێ هۆشیاری دا قوتابیان ل دۆر بکارئینانا دروست یا تۆرێن جڤاکی وەک پێدڤیەکا سەردەمیانە. هەروەسا دەستخۆشی ل مەکوریا مالباتێن قوتابیان کر کو رۆلەکێ مەزن هەبوویە د گەهاندنا زارۆکێن وان ب ڤێ قۆناغا سەرکەفتنێ.