ئەمڕۆ جووتیارانی قەزای پێنجوێن گردبوونەوەیەکی ناڕەزایەتییان ئەنجامدا و مانگرتنی گشتییان ڕاگەیاند. بەشداربووانی ناڕەزایەتییەکە ڕایانگەیاندووە کە بە شێوازێکی مەدەنیانە داواکارییەکانیان ئاڕاستەی لایەنە پەیوەندیدارەکان دەکەن، بە مەبەستی چارەسەرکردنی ئەو ئاستەنگانەی ڕووبەڕوویان بووەتەوە.
سەرەکیترین داواکاریی جووتیارە مانگرتووەکان بریتییە لە کەمکردنەوەی کرێی قەپان، کە داوا دەکەن بڕەکەی داببەزێندرێت بۆ ٢ تا ٣ هەزار دینار.
ئەوان ئاماژە بەوە دەکەن کە بەرزیی کرێی پێشووی قەپان بارگرانییەکی دارایی گەورەی لەسەر شان دروستکردوون و زیان بە ئابووری و بژێویی خێزانەکانیان دەگەیەنێت.