وەزارەتی ناوخۆی حکومەتی هەرێمی کوردستان، وەڵامی لێدوانەکانی کادیرێکی حیزبی لە کەناڵی (8) دەداتەوە و ڕایدەگەیەنێت، ئەو دەنگۆیانەی باس لەوە دەکەن چەکەکانی ئەمریکا لە کۆگاکانی وەزارەتی ناوخۆ لە هەولێرن، “هەڵبەستراو و دوورن لە ڕاستی” و بەو هۆیەشەوە سکاڵای یاسایی لەسەر کەناڵەکە و میوانەکە تۆمار دەکەن.
رۆژی شەممە، 2ی ئایاری 2026، ڕاگەیاندنی وەزارەتی ناوخۆی هەرێمی کوردستان ڕوونکردنەوەیەکی بڵاوکردەوە، تێیدا هاتووە: “لە چاوپێکەوتنێکی کەناڵی 8دا، بێژەر و کادیرێکی حیزبی باسیان لەوە کردووە کە گوایە ئەو چەکانەی ئەمریکا داویەتی بە هەرێمی کوردستان، رادەستی وەزارەتی ناوخۆ کراون و لە کۆگایەکی وەزارەت لە شاری هەولێر دانراون.”
وەزارەتی ناوخۆ ئەو لێدوانانە بە توندی رەتدەکاتەوە و دەڵێت: “ئەم قسانە سەرلەبەری هەڵبەستراو و چەواشەکاریین و هیچ بنەمایەکیان نییە و دوورە لە ڕاستی.”
لە بەشێکی دیکەی ڕاگەیەندراوەکەدا، وەزارەتی ناوخۆ ئاماژەی بەوە کردووە کە “ئەوانەی ئەو چەکانەیان بردووە، هەموو هەوڵێک دەدەن بۆ شاردنەوەی ڕاستی بابەتەکە و بەلاڕێدابردنی ڕای گشتی، بەڵام رۆژێک دێت لێپرسینەوەیان لەگەڵ بکرێت.”
سەبارەت بە رێکارە یاساییەکان، وەزارەتی ناوخۆ جەختی کردووەتەوە کە وەک مافێکی خۆیان، سکاڵای یاسایی لەسەر کەناڵەکە و میوانەکەش تۆمار دەکەن و دەبێت لەبەردەم دادگا بەڵگەکانیان بۆ ئەو قسانە پێشکەش بکەن، “ئەگینا دەبێ باجی بڵاوکردنەوەی تۆمەتی هەڵبەستراو بدەن.”