ئێوارەی ئەمڕۆ دووشەممە، لە بەردەم پارکی شانەدەر لە شاری هەولێر، پێنجەمین فیستیڤاڵی بەرهەمە ناوخۆییەکان بە بەشداریی ژمارەیەکی بەرچاو لە خاوەنکاران، بەرهەمهێنەران و هاووڵاتییان کرایەوە.
فیستیڤاڵەکە بە ئامادەبوونی ئومێد خۆشناو، پارێزگاری هەولێر و سەروەر هاواری، بریکاری وەزارەتی بازرگانی و ژمارەیەک لە بەرپرسانی حکومی و کەرتی تایبەت دەستیپێکرد. تێیدا جۆرەها کاری دەستی، خۆراکی سروشتی و کەلوپەلی جۆراوجۆری ناوخۆیی نمایش کراون.
ئومێد خۆشناو، پارێزگاری هەولێر لە کاتی بەسەرکردنەوەی بەشەکانی فیستیڤاڵەکەدا رایگەیاند: “پشتگیریکردنی جوتیاران و بەرهەمهێنەرانی ناوخۆ، ستراتیژی جێگیری پارێزگای هەولێرە بۆ بووژاندنەوەی ئابووری و رەخساندنی دەرفەتی کار بۆ هاووڵاتیان.”
ئەم فیستیڤاڵە لە چوارچێوەی هەوڵە بەردەوامەکانی حکومەتی هەرێمی کوردستان دێت بۆ گەشەپێدانی کەرتی تایبەت و هاندانی هاووڵاتییان بۆ بەکارهێنانی بەرهەمی ناوخۆیی.