ئەڤرۆ پێنجشەمبی، ٢١ێ گولانا ٢٠٢٦ێ، ب ئارمانجا پێشئێخستنا کەرتێ چاندنێ و پشتەڤانیکردنا بەرهەمێ ناڤخۆیی، ل قەزا دهۆکێ روینشتنەکا گفتوگۆیێ ل ژێر ناڤونیشانێ “داهێنان بۆ چارەسەریێن کرداری د کەرتێ چاندنێ دا” هاتە ئەنجامدان.
روینشتن ب هەڤکاری د ناڤبەرا ئەنستتیوتا داهێنان و نویگەریێ یا حکۆمەتا هەرێما کوردستانێ و قایمقامیا قەزا دهۆکێ دا هاتبوو ڕێکخستن. د کۆمبوونێ دا هەر ئێک ژ کەریم سلێمان، بریکارێ وەزارەتا چاندنێ، بریندار حەیدەر، قایمقامێ دهۆکێ و د. ئازاد نەجار، سەرۆکێ ئەنستتیوتا داهێنان و نویگەریێ ئامادەبوون.
ئارمانجا سەرەکی یا ڤێ کۆمبوونێ، گوهداریگرتن بوو ل داخوازی و کێشەیێن جوتیارێن دەڤەرێ و ناسینا وان ئالنگاریێن سەرەکی یێن کو ڕێگرن ل بەردەم گەشەکرنا کەرتێ چاندنێ.
د پانێلێ دا، تیشک خرایە سەر گرنگیا بکارئینانا داهێنان و تەکنۆلۆژیایێ بۆ دیتنا چارەسەریێن کرداری بۆ ئاریشەیێن جوتیاران. ئامادەبوویان جەخت ل سەر وێ چەندێ کر کو کلیلا بهێزکرنا ئابوورێ هەرێما کوردستانێ، زێدەکرنا کوالیت و ڕێژەیا بەرهەمێ ناڤخۆیی یە ب ڕێکا داهێنانێن زانستی.
ل کۆتاییا روینشتنێ دا، دەرگەهێ گفتوگۆیێ بۆ جوتیاران هاتە ڤەکرن و بەرپرسێن ئامادەبوو بەرسڤا تێبینی و پێشنیارێن وان دان، ب مەبەستا دارشتنا پلانەکا کارا بۆ چارەسەرکرنا گرفتێن کەرتێ گشتۆکاڵی ل پارێزگەها دهۆکێ