ل باژێرێ دهۆکێ و ب هەلکەفتا سالرۆژا پارێزگەهبوونا شارێ دهۆکێ، قارەمانییەکا یارییا پادلێ بۆ رۆژنامەڤانان هاتە ڤەکرن، کو تێدا ٢٤ تیمێن کچ و کورا بەشدارن.
ئێڤاریا ئەڤرۆ ئێکشەمبی، ٢٤ێ گولانا ٢٠٢٦ێ، ب ئامادەبوونا ماجد سەید سالح، نوینەرێ پارێزگارێ دهۆکێ و ڤیان عەباس، بەرپرسا تایێ دهۆکێ یێ سەندیکا رۆژنامەڤانێن کوردستانێ، قارەمانییا پادلێ یا رۆژنامەڤانان دەستپێکر.
ئەڤ قارەمانییە ژ لایێ سەندیکا رۆژنامەڤانان و ب سپۆنسەرییا کۆمپانیا “کاڤین فارم” هاتییە رێکخستن. ئارمانج ژ ڤێ چالاکییێ ب هێزکرنا گیانێ هەڤکارییێ و لێکنێزیکبوونا رۆژنامەڤانانە ب رێکا وەرزشێ.
د قارەمانییێ دا ١٨ تیمێن کورا و ٦ تیمێن کچان بەشدارن و دێ بۆ ماوێ دو رۆژان یا بەردەوام بیت.
ماجد سەید سالح، نوینەرێ پارێزگارێ دهۆکێ د پەیڤەکێ دا راگەهاند: “خۆشحالین کو ئەڤرۆ ئەڤ بزاڤا وەرزشی وەک ئێکەم چالاکییا ب هەلکەفتا سالرۆژا پارێزگەهبوونا دهۆکێ دهێتە ئەنجامدان.” هەروەسا ناڤبری جەخت ل سەر پشتهڤانییا بەردەوام یا حکومەتا هەرێما کوردستانێ بۆ کەرتێ وەرزشێ و گەنجان کر.
هەرچەندە ب رەنگەکێ فەرمی سالرۆژا پارێزگەهبوونا دهۆکێ دکەڤیتە ٢٧ێ گولانێ، لێ ژبەر کو ئەڤسالە ئەڤ رۆژە دگەل ئێکەم رۆژا جەژنا قوربانی هەڤدەمە، چالاکی پێشوەخت هاتنە دەستپێکرن.