ئهمڕۆ شەممە، داواکاری گشتیی بەلجیکا ڕایگەیاند، ژنێکی کەنەدی بە ڕەگەز چینی کە وەک مەشقکار لە بارەگای سەربازیی ناتۆ لە بەلجیکا کاری دەکرد، بە تۆمەتی سیخوڕی دەستگیرکراوە.
نوسینگەی داواکاری گشتیی فیدراڵی لە بەیاننامەیەکدا ئاشکرای کرد: “گومان دەکرێت ئەم ژنە بۆ بەرژەوەندی ‘وڵاتێکی سێیەم’ سیخوڕی کردبێت و ئەندامی ڕێکخراوێکی تاوانکاری بێت.”
ئەو ژنە لە بارەگای باڵای هێزە هاوپەیمانەکان لە ئەوروپا (SHAPE) کە بنکەکەی لە شاری “مۆنس”ی بەلجیکایە، وەک مەشقکار کاری کردووە. تائێستا داواکاری گشتی هیچ زانیارییەکی وردی لەسەر ناسنامەی ژنەکە یان ئەو وڵاتەی سیخوڕی بۆ کردووە، بڵاونەکردووەتەوە.
بارەگای (SHAPE) چییە؟
بارەگای (SHAPE) گرنگترین ناوەندی سەربازیی ناتۆ و بنکەی سەرەکیی فەرماندەیی ئۆپەراسیۆنەکانی هاوپەیمانییەکەیە. ئەم ناوەندە بەرپرسە لە پلاندانان و جێبەجێکردنی سەرجەم ئۆپەراسیۆنە سەربازییەکانی ناتۆ کە لە ٣٢ وڵاتی ئەندام پێکهاتووە.
چۆن ئاشکرا بوو؟
بەگوێرەی ڕاپۆرتی داواکاری گشتی، دەزگای ئەمنیی ناوخۆیی (SHAPE) گومانیان لە ڕەفتارەکانی ئەو کارمەندە کردووە و دواتر لایەنە پەیوەندیدارەکانیان لە هەواڵگریی بەلجیکا ئاگادار کردووەتەوە. پاش لێکۆڵینەوە و پشکنینی ماڵەکەی و شوێنی کارەکەی، ڕۆژی هەینی بە فەرمی دەستگیرکرا.
کاریگەریی لەسەر ناتۆ
وتەبێژێکی بارەگای (SHAPE) لە لێدوانێکدا دڵنیایی دا کە هیچ ئاماژەیەک نییە بۆ ئەوەی چالاکییەکانی ئەم ژنە زیانی بە ئامادەیی ئۆپەراسیۆنەکان، سیستەمی فەرماندەیی و کۆنترۆڵ، یان ئەرکە بەردەوامەکانی ناتۆ گەیاندبێت. وتەبێژەکە وتی: “بارەگای SHAPE بەبێ پچڕان بەردەوامە لە ڕاپەڕاندنی بەرپرسیارێتییەکانی خۆی.”
لە ئێستادا لێکۆڵینەوەکان بەردەوامن و داواکاری گشتیی بەلجیکا ڕایگەیاندووە کە بۆ پاراستنی ڕەوتی لێکۆڵینەوەکە، هیچ لێدوانێکی زیاتر نادەن.