وەزارەتی کارەبا لە راگەیەندراوێکدا داشکاندنێکی بەڕێژەی 50% بۆ قەرزی کۆنی پێش پڕۆژەی ڕووناکی ڕاگەیاند، کە لە 3ـی ئاب تاوەکو 10ی ئەیلولی 2026 جێبەجێ دەکرێت.
بەپێی ڕاگەیەندراوەکە، داشکانەکە تەنیا قەرزی کۆنی پێش پڕۆژەی ڕووناکی دەگرێتەوە و پارەی پسوولەکانی ڕووناکی ناگرێتەوە، هەروەها مەرجە بۆ سوودمەندبوون لەم داشکاندنە، هاوبەشان تەواوی بڕی ماوەی قەرزەکە بەیەکجار بدەن. ئەم بڕیارە وەک دوایین دەرفەت و هەلێک بۆ دانەوەی قەرزە کۆنەکان دانراوە و بەم شێوەیە دابەش دەبێت:
• 50% داشکاندن: بۆ هەموو هاوبەشانی ماڵان و کشتوکاڵی.
• 25% داشکاندن: بۆ هەموو هاوبەشانی پیشەسازی، بازرگانی و میری (جگە لەو هاوبەشانەی فیدەری تایبەت بەخۆیان هەیە).
وەزارەتی کارەبا ئاماژەی بەوەش کردووە که وەک بەشێک لە ئامادەکارییە تەکنیکییەکان، پارەدانی کارەبا لە ڕێگەی ئی-پسوولە و هۆبەکانی فرۆشیاری ووزە بۆ ماوەیەکی کاتی لە نێوان 30ی تەمموز بۆ 3ی ئاب ڕادەوەستێت، بۆیە داوا لە هاووڵاتیان دەکرێت پێش 30ی تەمموز پسوولەکانیان بدەن و لە ڕێگەی سیستمی ئی-پسوولەوە مامەڵەکانیان ئەنجام بدەن تاوەکو خۆیان لە قەرەباڵغی بەدوور بگرن.
لە کۆتاییدا، وەزارەت جەخت لەوە دەکاتەوە کە لە قۆناغی نوێدا پێویستە پارەی پسوولەکان لە کاتی خۆیدا لە ڕێگەی میکانیزمی 50 ڕۆژی پارەدان بدرێن، و هاوبەشان دەتوانن بۆ هەر پرسیارێک پەیوەندی بە سەنتەری خزمەتگوزاری ڕووناکی ژمارە (1992)وە بکەن.