بەبۆنەی ٨٠یەمین ساڵیادی دامەزراندنی پارتی دیموکراتی کوردستان و ساڵیادی لەدایکبوونی جەنابی سەرۆک بارزانی، مەکتەبی ڕێکخستنی پارتی لە بادینان ڕێوڕەسمێکی تایبەتی بۆ پێشوازیکردن لە هاووڵاتییان و لایەنگرانی حزبەکە ڕێکخست.
لەو چوارچێوەیەدا، سەربەست لەزگین، ئەندامی مەکتەبی سیاسی و بەرپرسی مەکتەبی ڕێکخستنی پارتی دیموکراتی کوردستان لە بادینان، شانبەشانی دکتۆرە ڤیان سلێمان و سەباح بەیتوڵڵا، یاریدەدەرانی بەرپرسی مەکتەبی ڕێکخستن، پێشوازییان لە لێشاوێکی زۆری کادیران، ئەندامان و چین و توێژە جیاوازەکانی خەڵکی ناوچەی بادینان کرد.
ئامادەبووان بە گەرمییەوە پیرۆزبایی ئەم یادە نەتەوەییەیان لە سەرکردایەتی پارتی و جەنابی سەرۆک بارزانی کرد، کە هاوکاتبوونی ساڵیادی دامەزراندنی پارتی و لەدایکبوونی سەرۆک بارزانی وەک وەرچەرخانێکی گرنگ لە مێژووی بزووتنەوەی ڕزگاریخوازی کورد وەسف کرا.
ئەم پێشوازییە نیشانەی زیندوویی پارتی دیموکراتی کوردستانە لە ناوچەکە و دووپاتکردنەوەی پەیمانی وەفاداری کادیر و جەماوەری بادینان بوو بۆ بەردەوامبوون لەسەر ڕێبازی بارزانیی نەمر.