رێڤەبەریا گشتی یا وەبەرهێنانێ ل پارێزگەها دهۆکێ، مۆڵەتا فەرمی دا پڕۆژەیەکێ مەزن و ستراتیجی یێ کەرتی چاندنێ ل دەڤەرداریا ئاکرێ، کو ب ئێک ژ پڕۆژە هەرە گرنگێن دەڤەرێ دهێتە هەژمارتن.
ل گۆرەی زانیاریێن راگەهاندنا رێڤەبەریا گشتی یا وەبەرهێنانێ ل دهۆکێ، پڕۆژە ل سەر رووبەرێ (233) دۆنمان ل دەڤەرا “ماملیان” یا سەر ب قەزایا ئاکرێ ڤە دهێتە ئاڤاکرن. سەرمایەیێ تەرخانکری بۆ ڤی پڕۆژەی دگەهتە 10 ملیۆن دۆلاران و ژ لایێ کۆمپانیەکا ناڤخۆیی ڤە دهێتە بجهئینان.
پڕۆژە ژ چ پێکدهێت؟
ئەڤ پڕۆژە ب شێوازەکێ سەردەم دهێتە ئاڤاکرن و چەندین پشکێن جودا یێن بەرهەمئینانێ و خزمەتگوزاریێ بخۆڤە دگریت، ژ وان ژی:
خانیێن شیشەیی (Greenhouses) یێن پێشکەفتی بۆ چاندنا جورێن جودا یێن فێقی.
کارگەها پرۆسێسکرنا فێقی و کۆگەهێن سارکەر بۆ پاراستنا بەرهەمی.
جهێن تایبەت بۆ چاندنا دارێن فێقی و کۆگەهێن مەزن.
خزمەتگوزاری و ژێرخان
پڕۆژە دێ بیتە خودان ژێرخانەکا تەمام، کو تێدا ئاڤاهیێن کارگێری، ئاڤاهیێن ئاکنجیبوونێ بۆ کرێکاران، وێستگەها کارەبێ، بیرێن ئاڤێ و تانکێن مەزن یێن کۆگهکرنا ئاڤێ دهێنە دابینکرن. هەروەسا تۆڕەکا جاددە و پەساران ل گەل باخچە و کەسکاتیێ د ناڤ پڕۆژەی دا دێ هێنە دروستکرن.
ئەڤ هەنگاڤە د چوارچۆڤەیا هەوڵێن حکومەتا هەرێما کوردستانێ داکو پەرە ب کەرتی چاندنێ بدەت و ژێرخانا ئابووریا دەڤەرێ ب هێزتر لێ بکەت، ب تایبەت ل دەڤەرداریا ئاکرێ کو ب ئاخ و سەقایێ خۆ یێ گونجای بۆ چاندنێ دهێتە نیاسین.