بەڕێوەبەرایەتی ئاسایشی هەولێر دەستگیرکردنی تۆمەتبارێکی ڕاگەیاند کە لە ڕێگەی تۆڕە کۆمەڵایەتییەکانەوە سەرقاڵی ساغکردنەوە و فرۆشتنی دراوی ساختە بووە و چەندین هاووڵاتی فریوداوە.
لە ڕاگەیەندراوێکی بەڕێوەبەرایەتییەکەدا هاتووە: “دوای ئەنجامدانی بەدواداچوونی ورد لەلایەن تیمی تاوانی بەڕێوەبەرایەتییەکەمان و بە فەرمانی بەڕێز دادوەری لێکۆڵینەوەی ئاسایشی هەولێر، توانرا تۆمەتبار ( م ، خ ، ر) دەستگیر بکرێت.”
سەبارەت بە شێوازی کارکردنی تۆمەتبارەکە، ئاسایش ئاماژەی بەوە کردووە کە ناوبراو لە تۆڕە کۆمەڵایەتییەکان هەژمارێکی بەناوی (kingdolar28) دروستکردووە و ڕۆژانە بانگەشەی بۆ فرۆشتنی (دراوی ساختەی لیبی) کردووە، بەو هۆیەشەوە ژمارەیەک هاووڵاتی کەوتوونەتە داوی فێڵەکانییەوە.
بەڕێوەبەرایەتی ئاسایشی هەولێر داوا لەو هاووڵاتییانە دەکات کە لەلایەن ئەم تۆمەتبارەوە فریودراون یان سکاڵای یاساییان هەیە، سەردانی بارەگای بەڕێوەبەرایەتییەکە بکەن بۆ تۆمارکردنی سکاڵا.
لە کۆتایی ڕاگەیەندراوەکەدا، ئاسایش هۆشداری دەداتە هاووڵاتییان کە بە هیچ شێوەیەک مامەڵە بە دراوی ساختەوە نەکەن، چونکە کارێکی نایاسایی و قەدەغەکراوە.