لە چوارچێوەی هەوڵە بەردەوامەکانی حکوومەت بۆ پەرەپێدانی ژێرخانی ڕێگاوبان، کارکردن لە پڕۆژەی دروستکردنی ڕێگای دووسایدی هەولێر-کۆیە بەچڕی بەردەوامە.
ئەم پڕۆژەیە هەولێری پایتەخت بە قەزای کۆیە و لەوێشەوە بە پارێزگای سلێمانییەوە دەبەستێتەوە و ئامانج لێی، گۆڕینی ڕێگایەکی یەکسایدی پڕمەترسییە، بۆ ڕێگایەکی دووسایدی سەردەمیانە و سەلامەت.
درێژیی ئەم ڕێگایە بە هەردوو قۆناغەکەیەوە 48 کیلۆمەترە، کە هەر سایدێکی پێک هاتووە لە 3 ڕێڕەو بە پانیی 12 مەتر.
پڕۆژەکە بە شێوازێکی زانستی و پێشکەوتوو دیزاین کراوە و ژمارەیەک پرد و یەکتربڕی گرنگ لەخۆ دەگرێت، کە بریتین لە 7 ئۆڤەرپاس، 4 ژێرپرد، 2 پرد بە درێژیی 90 مەتر، 1 پرد بە درێژیی 250 مەتر و بەرزیی 42 مەتر، لەگەڵ 2 یەکتربڕی پەپوولەیی و زیاتر لە 180 ئاوبەری سندووقی.
لەڕووی ئەندازیاری و قەبارەی کارکردنەوە، پڕۆژەکە هەنگاوی زۆری بڕیوە؛ تا ئێستا 4 ملیۆن و 800 هەزار مەتر سێجا کاری بڕین و نزیکەی 5 ملیۆن مەتر سێجا کاری پڕکردنەوەی بۆ ئەنجام دراوە.
لە بەشی قیرتاوکردنیشدا، 23 کیلۆمەتری ڕێگاکە قیڕ کراوە و ئێستا کاری ڕاخستنی چینی دووەمی قیڕ بەردەوامە، کە بڕیارە تەواوی ڕێگاکە بە 3 چین قیرتاو بکرێت.
جێگەی باسە، تەواوی کارەکانی پڕۆژەکە بە دەستی کاری ناوخۆیی بنیاد دەنرێت و تا ئێستا 42٪ـی کارەکانی جێبەجێ کراوە. هەروەها بڕیار دراوە کە پێش وادەی دیاریکراوی خۆی، کارەکانی پڕۆژەکە کۆتایی پێ بێت و بخرێتە خزمەتی هاووڵاتییانەوە.
بە تەواوبوون و کردنەوەی ئەم ڕێگایە، دووری و ماوەی گەشتکردن لە نێوان هەولێر و کۆیە بۆ تەنها 27 خولەک کەم دەبێتەوە، ئەمەش دەبێتە هۆی کەمکردنەوەی مەترسییەکانی ڕووداوی هاتوچۆ.