پاراستنی تەندروستیی دەروونی تەنیا بە زیادکردنی خووی نوێ بۆ ژیانی رۆژانە دەست پێ ناکات، بەڵکو پێویستی بە پێداچوونەوە بەو رەفتارە دووبارانەیە هەیە کە رەنگە ئاسایی دەربکەون، بەڵام بە تێپەڕبوونی کات دەبنە سەرچاوەی گوشار و ماندووبوون.
تەنیا بەهۆی ئەوەی یەکێک لەم رەفتارانە بەشێوەیەکی کاتی دووبارە دەبێتەوە، بەو مانایە نییە کێشەیەکی دەروونی بوونی هەیە و هەموو کەسێکیش بە یەک شێواز کاریگەر نابێت. بەڵام بەردەوامبوونیان و کاریگەرییان لەسەر خەو، کار و پەیوەندییە کۆمەڵایەتییەکان، رەنگە پێویستی بە گۆڕانکاری لە رۆتینی رۆژانەدا هەبێت. بەپێی راپۆرتێکی دەیلی ستار، ئەو خووانە بریتین لە:
تەماشاکردنی ناوەڕۆکی بێزارکەر لە شەواندا بەدواداچوونی هەواڵەکان رەنگە بگۆڕێت بۆ تێڕوانینێکی بەردەوام بۆ ناوەڕۆکی نەرێنی و بێ ئاگابوون لە کات، کە بەکارهێنەر لە هەواڵێکی نیگەرانکەرەوە بۆ یەکێکی دیکە دەگوازرێتەوە. ئەم رەفتارە بەر لە خەوتن بێزارکەرتر دەبێت، چونکە ناوەڕۆکێکی نیگەرانکەر لەگەڵ بەکارهێنانی مۆبایل لەو کاتەدا تێکەڵ دەبێت کە جەستە و مێشک پێویستیان بە ئارامییە.
چارەسەری ئەم کێشەیە پێویستی بە دابڕان لە هەواڵەکان نییە، بەڵکو دەکرێت کاتێکی دیاریکراو بۆ بەدواداچوونی هەواڵەکان تەرخان بکرێت، ئاگادارکەرەوە نەویستراوەکان رابگیرێن و مۆبایل لەو ماوەیەی بەر لە خەوتن دوور بخرێتەوە.
کارکردن بەبێ پشوودان سەرقاڵبوون بە کار و بەردەوامیدان پێی بەبێ پشوودان، رەنگە ببێتە هۆی دابەزینی ئاستی بەرهەمداری و زیادبوونی ئاستی گوشاری دەروونی. جەستە و مێشکی مرۆڤ پێویستیان بە کاتی پشوودان هەیە بۆ ئەوەی وزەی پێویست بۆ بەردەوامبوون بەدەست بهێننەوە.
پەیڕەوکردنی رۆتینێک کە تێیدا پشووی کورت لە کاتی کارکردندا دەستەبەر دەکرێت، یارمەتیدەرە بۆ کەمکردنەوەی ماندووبوون و پاراستنی هاوسەنگیی دەروونی.