یاساناس و سیاسەتمەداری دێرین، دکتۆر ناسیح غەفوور، لە لێدوانێکدا بۆ «زاگرۆس» جەخت لەوە دەکاتەوە کە ئەنجامی ڕیفراندۆمی سەربەخۆیی گەلی کوردستان، کە لە ٢٥ی ئەیلوولی ٢٠١٧ بەڕێوەچوو، وەک بەڵگەنامەیەکی یاسایی و مێژوویی هەمیشەیی دەمێنێتەوە و نیشاندەری ئیرادەی ڕاستەقینەی گەلە بۆ دیاریکردنی چارەنووس.
ناوبراو ئاماژە بەوە دەکات کە پرۆسەکە وەک وەڵامێکی سروشتی بۆ دەیان ساڵ قوربانیدان و نامۆبوون لە پرۆسەی حوکمڕانیی عێراقدا هات، کاتێک خەڵکی کوردستان بە سەرۆکایەتیی سەرۆک مەسعود بارزانی و بە پشتگیریی تەواوی هێزە سیاسییەکان و بەشداریی سەرجەم پێکهاتەکان (کورد، تورکمان، مەسیحی و ئەوانی تر)، بە ڕێژەیەکی بەرز و بە زیاتر لە ٪٩٢ دەنگیان بە “بەڵێ” دا.
د. ناسیح غەفوور هۆکاری سەرەکیی پەنابردن بۆ ڕیفراندۆم دەگەڕێنێتەوە بۆ پێشێلکردنی دەستوور و پشتگوێخستنی ماددەی ١٤٠ و مافە دارایی و سیاسییەکانی هەرێم لەلایەن حکوومەتی ناوەندییەوە پاش ساڵی ٢٠٠٣، لەگەڵ بڕیارە نادادپەروەەرەکانی وەک بڕینی بودجە و مووچەی هەرێم.
لە کۆتاییدا، ئەم یاساناسە جەخت دەکاتەوە کە ڕیفراندۆم بەرهەمی پەیڕەوکردنی دیموکراسیی ڕاستەوخۆیە و هیچ بڕیارێکی سیاسی یان سەربازی ناتوانێت شەرعیەتی دەنگی گەل هەڵبوەشێنێتەوە، بە جۆرێک کە ئەمڕۆ ئەنجامی ئەو پرۆسەیە بووەتە کارتی یاسایی و مێژوویی بەهێز لە دەستی گەلی کوردستاندا بۆ هەر قۆناغێکی گونجاوی داهاتوو.