توێژینەوەیەکی بەرفراوان کە نزیکەی یەک ملیۆن کەسی لە بەریتانیا گرتووەتەوە، دەریدەخات خواردنەوەی چای یان قاوەی زۆر گەرم پەیوەندیی بە بەرزبوونەوەی زیاتر لە سێ هێندەی مەترسیی تووشبوون بە شێرپەنجەی خانە پەڕەیییەکانی سوورێنچکەوە هەیە، بەراورد بەو کەسانەی خواردنەوەی شێلەیان پێ باشترە.
توێژەران داتای 977 هەزار و 282 بەشداربوویان لە دوو توێژینەوەی گەورەدا شیکردەوە، کە بریتی بوون لە توێژینەوەی ملیۆنێک ژن و بانکی زیندەییی بەریتانی. ئەمە بە گەورەترین توێژینەوە دادەنرێت کە تا ئێستا پەیوەندیی نێوان خواردنەوە گەرمەکان و شێرپەنجەی سوورێنچک روون دەکاتەوە.
دەرەنجامەکان دەریدەخەن ئەو کەسانەی حەزیان لە خواردنەوەی زۆر گەرمە، بەراورد بەوانەی خواردنەوەی شێلە هەڵدەبژێرن، 3.17 هێندە زیاتر مەترسیی تووشبوونیان بە شێرپەنجەی خانە پەڕەیییەکانی سوورێنچک لەسەرە، ئەمەش دوای ئەوەی ڕێژەی خواردنەوەکان بە ژمێرە کراوە.
مەترسییەکە 69%ـی لای ئەو کەسانە بەرزبووەتەوە کە حەزیان لە خواردنەوە گەرمەکانە. ئەم ڕێژەیە بۆ 71%ـی بەرزبووەتەوە لای ئەو کەسانەی رۆژانە 6 خواردنەوەی گەرم یان زیاتر دەخۆنەوە بەراورد بەوانەی بڕێکی کەمتر دەخۆنەوە، ئەوەش دوای ئەوەی پلەی گەرمیی خواردنەوەکان بە ژمێرە کراوە.
پەیوەندییەکە لە نێوان حەزکردن لە چای یان قاوەدا جیاوازییەکی ئەوتۆی نەبووە. دەرنەکەوتووە زیادکردنی شیر کاریگەرییەکی ئەوتۆی لەسەر ئەو مەترسییانە هەبێت کە پەیوەستن بە پلەی گەرمییەوە.
دەرەنجامەکان تیشک دەخەنە سەر هۆشداریی ئاژانسی نێودەوڵەتیی توێژینەوەی شێرپەنجە، کە لە ساڵی 2016ـدا ئەو خواردنەوانەی پلەی گەرمییان لە 65 پلەی سەدی تێپەڕ دەکات، بە ئەگەرێکی زۆرەوە وەک هۆکاری تووشبوون بە شێرپەنجە لای مرۆڤ پۆلێنی کردوون. ئەو پۆلێنکردنەش دوای دەرکەوتنی ئەو ئەنجامانە هاتووە.