سەرۆك مەسعود بارزانی، پێشوازیی لە کونسوڵی گشتیی ئەڵمانیا لە شاری هەولێر كرد و سوپاسی ئەرک و ماندووبوونی کونسوڵی گشتیی ئەڵمانیای کرد و هیوای سەرکەوتنی بۆ کونسوڵی تازەی ئەڵمانیا لە هەولێر خواست.
ئەمڕۆ چوارشەممە 28/8/2024 لە سەلاحەدین، سەرۆک بارزانی پێشوازی لە کڵاوس شترایشەر، کونسوڵی گشتیی ئەڵمانیا لە هەولێر کرد کە بە بۆنەی کۆتاییهاتنی ئەرکەکەی و بە مەبەستی ماڵئاواییکردن و ناساندنی ئاڵبێرت فۆن ویتک وەک جێگرەوەی، سەردانی سەرۆک بارزانیی کردبوو.
لە دیدارەکەدا کۆنسوڵی گشتیی ئەڵمانیا لە هەولێر سوپاسی سەرۆک بارزانی کرد کە لە ماوەی کارکردنی لە هەولێر هەردەم پشتیوانی بووە و پێزانینی بۆ میوانداریی و هەماهەنگیی دامەزراوەکانی هەرێمی كوردستان و خەڵکی کوردستان هەبوو، کونسوڵی ئەڵمانیا ئاماژەی بە گرنگیی پەیوەندییەکانی هەرێمی کوردستان و وڵاتەکەی دا کە دەبێ لە داهاتووشدا بە بایەخەوە بەردەوامیی هەبێت.
لای خۆیەوە سەرۆک بارزانی وێڕای جەختکردنەوە لە بایەخی بەرەوپێشەوەچوونی هەماهەنگی و بەردەوامیی پەیوەندییەکانی نێوان هەرێمی کوردستان و ئەڵمانیا، سوپاسی ئەرک و ماندووبوونی کونسوڵی گشتیی ئەڵمانیای کرد و هیوای سەرکەوتنی بۆ کونسوڵی تازەی ئەڵمانیا لە هەولێر خواست.
هەر لەو دیدارەدا ڕۆشنایی خرایە سەر هەڵبژاردنەکانی ئۆکتۆبەری داهاتووی پەرلەمانی کوردستان و سەرۆک بارزانی بەرچاوڕوونیی پێویستی لەوبارەیەوە خستە ڕوو و جەختیش لەوە کرایەوە کە پێویستە هەڵبژاردنێکی پاک و شەفاف و لە کەشێکی ئارام بەڕێوە بچێت.
هەڕەشەکانی تیرۆر لەسەر ئاستی عێراق و ناوچەکە تەوەرێكی دیكەی ئەو دیدارە بوو.
