سەرۆکوەزیرانی ئیسرائیل لە پەرلەمانی وڵاتەکەی گوتی، دوایین هێرشیان بۆ سەر ئێران سێ ئامانجی پێکاوە و تواناییی بەرگری و دروستکردنی مووشەکی ئێرانیان لاواز کردووە و ناوەندێکی ئەتۆمییان پێکاوە بەلام بەڵام بەرنامەی ئەتۆمیی ئێران لەکار نەکەوتووە.
وەزیری دەرەوەی ئێرانیش دەڵێت لە کات و شوێنی گونجاودا وەڵامی ئەو هێرشەی ئیسرائیل دەدەنەوە.
بنیامین ناتانیاهۆ، سەرۆکوەزیرانی ئیسرائیل لە وتارێکیدا لە پەرلەمان ڕایگەیاند، لە دوایین هێرشی تۆڵەسەندنەوەیان بۆ سەر ئێران تواناییی بەرگری و بەرهەمهێنانی مووشەکی ئەو وڵاتەیان لاواز کردووە و زەبریان لە بەرنامەی ئەتۆمیی وڵاتەکەش وەشاندووە.
دوای هێرشەکەی ئیسرائیل بەرپرسانی سیاسی و سەربازیی ئێران گوتیان، وەڵامی ئەم هێرشە دەدەنەوە.
عەباس عێراقچی، وەزیری دەرەوەی ئێران لە دواین لێدوانیدا دەڵیت، یەکێک لە ڕێگاکانی ڕاگرتنی شەڕ دەربڕینی ئامادەییە بۆ شەڕ و هێرشەکەی ئیسرائیل لە ڕوانگەی ئێرانەوە هێرشێکی نوێیە بۆ سەر ئەم وڵاتە و مافی وڵامدانەوەی بۆ خۆیان بە پارێزراو دەزانن و لە کات و شوێنی گونجاودا وەڵامی دەدەنەوە.