بۆ كاتی بەفر و باران ڕێنوێنی بۆ هاووڵاتییان بڵاو كرایەوە

فەرمانگەی میدیا و زانیاریی حكوومەتی هەرێمی كوردستان داوای لە شۆفێران و هاووڵاتییان كرد، لەم کاتەی بارانبارینی بەخوڕ و بەفربارینەدا، زۆر بە وریاییەوە شۆفێری بکەن و ڕێنوێنییەکانی بەرگریی شارستانی جێبەجێ بکەن.

ڕێنوێنییەكان ئەمانەن:

1- لە کاتی بارانی بەلێزمە، بە خێرایی شۆفێری مەکە بۆ پاراستنی گیانی خۆت و سەرنشینەکانت.

2- لەو شوێنانە دووربکەوە کە نزمایین و ئاوی لێ کۆبووەتەوە، تا دڵنیا نەبیتەوە لە ڕادەی قوڵی ئاوەکە، بە ئۆتۆمبێلەکەت پێیدا تێمەپەرە.

3- لە کاتی بەفرباریندا، بە وریاییەوە شۆفێری بکە، تا تووشی خلیسکانی ئۆتۆمبێل نەبیت.

4- لە کاتی گەشتکردندا بۆ ناو بەفر، لە شەقامە گشتییەکان دوورمەکەوە، سەردانی شوینە دوورە دەستەکان، سەرچیا و قەدپاڵی چیاکان مەکە.

5- لە کاتی چوونت بۆ ناوبەفر بە وریاییەوە ڕێ بکە، چاڵ و قوڵییەکان بە هۆی بەفرەوە دادەپۆشرێن و ناتوانیت بیانبینیت.

6- گرووپە شاخەوانییەکان لە کاتی کەشوهەوای بارانی بەلێزمە و بەفرباریندا، نابێت گەشت بۆ شوێنە بەرز و ناوچە شاخاوییەکان بکەن.

7- لە کاتی بوونی هەر ڕووداوێک لە هەر کاتێک و شوێنێکدا بن، دەتوانن پەیوەندی بە هێڵی گەرمی 115 تیمی فریاگوزاریی بەرگریی شارستانی بکەن.