چوارچێوەی هەماهەنگی لە کۆبوونەوەی خولیی خۆیدا لە نووسینگەی عەممار حەکیم و بە ئامادەبوونی عەلی فالح زەیدی، جەختی لە پاڵپشتیی تەواوی هێزە سیاسییەکان بۆ حکومەت کردەوە و ڕێککەوتن لەسەر پێویستیی خێراکردنی پڕۆسەی تەواوکردنی کابینەی وزاری.
گرنگترین خاڵەکانی کۆبوونەوەکە:
پاڵپشتیی سیاسی و پەرلەمانی: ئامادەبووان دووپاتیان کردەوە کە سەرجەم هێزە سیاسییەکان لە ناو پەرلەمان، لەسەر ئاستی سیاسی و لە ڕێگەی میدیاکانەوە بە تەواوی لە پشت حکومەتەوەن بۆ سەرخستنی کارنامە و بەرنامە چاکسازییەکەی.
دیدگای ئابووری و کەرتی کارەبا: سەرۆکوەزیران دیدگایەکی گشتگیری بۆ چارەسەرکردنی تەنگژەی ئابووری خستە ڕوو، بەتایبەت ئەو پێشنیارانەی کە پەیوەستن بە چارەسەرکردنی قەیرانی کارەبا و کاراکردنی یاساکانی کار و دەستەبەری کۆمەڵایەتی بۆ پاڵپشتیکردنی کەرتی تایبەت، کە سەرجەمیان پاڵپشتی چوارچێوەی هەماهەنگییان بەدەستهێنا.
ئامادەکردنی کاغەزی نیشتمانی: ڕێککەوتن لەسەر نووسینی کاغەزێکی فەرمی بە ناوی چوارچێوەی هەماهەنگییەوە کە گرنگترین دۆسیە نیشتمانییەکان لەخۆبگرێت، بۆ ئەوەی لە ناو هاوپەیمانیی “بەڕێوەبردنی دەوڵەت” گەڵاڵە بکرێت و ڕێککەوتنی گشتی لەسەر بکرێت.