ئەمڕۆ هەینی 2026/8/14،  نێچیرڤان بارزانی، سەرۆكی هەرێمی كوردستان، بۆ كۆچی دواییی خوالێخۆشبوو خاتوو نەهیلا ڕەئووف، هاوسەری پێشمەرگە و تێكۆشەری دێرین خوالێخۆشبوو مستەفا نێروەیی، لە پەیوەندییەكی تەلەفۆنیدا لەگەڵ بەڕێز ساڵح مستەفا نێروەیی ـی کوڕیان، پرسە و سەرەخۆشیی لە خانەوادە و کەسوکار و دۆستانیان کرد و هیوای خواست كە خوای مەزن گیانی خوالێخۆشبوو بخاتە بەر میهرەبانی و بەزەییی خۆی و ئارامی و دڵنەوایی بە هەمووان ببەخشێت.

لای خۆیەوە  ساڵح مستەفا نێروەیی، سوپاسی سەرۆكی هەرێمی کوردستانی کرد و پێزانینی خۆی و خانەوادەکەیانی بۆ پەیوەندیی تەلەفۆنی و هاوخەمیی بەڕێزیان بۆ كۆچی دواییی دایكی خوالێخۆشبوویان، دەربڕی.