سیاسەتمەداری ناوداری باکووری کوردستان، لەیلا زانا، لە پەیامێکی فەرمیدا کە لە شاری ئامەدەوە ئاراستەی مەسرور بارزانی، سەرۆکی حکومەتی هەرێمی کوردستانی کردووە، بە توندی سەرکۆنە و شەرمەزاری ئەو هێرشە درۆنییە دەکات کە کرایە سەر نووسینگەی تایبەتی سەرۆکوەزیران لە ناوچەی پیرمام.
لەیلا زانا لە دەقی نامەکەیدا هاتووە: “بەڕێز سەرۆکی حکوومەتی هەرێمی کوردستان، کاک مەسرور بارزانی؛ بەتوندی ئیدانەی هێرشەکەی سەر نووسینگەکەتان دەکەم. با دۆست و دوژمن بزانن کە ئەم سەدەیە، سەدەی ئازادیی گەلی کوردە!” زانا لە کۆتایی پەیامەکەیدا هیوای سەلامەتی بۆ گەلی کورد دەخوازێت و دەڵێت: “خودا هەموومان بپارێزێت.”
ئەم هەڵوێستەی لەیلا زانا دوای ئەوە دێت کە دەزگای دژەتیرۆری کوردستان ڕایگەیاند نووسینگەی سەرۆکی حکومەت و ماڵی بەڕێوەبەری ئاژانسی پاراستن لە پیرمام لە ڕێگەی درۆنی بۆمبڕێژکراوەوە کراونەتە ئامانج، کە ئەمەش کاردانەوەی توندی لەسەر ئاستی ناوخۆیی و نێودەوڵەتی بەدوای خۆیدا هێناوە.