دکتۆر دیندار زێباری، ڕێکخەری ڕاسپاردە نێودەوڵەتییەکان لە حکومەتی هەرێمی کوردستان، لە ٣٨ـەمین ساڵیادی ئەنفالی بادینان، جەختی کردەوە کە ئەنفال تەنها کارەساتێکی مێژوویی نییە، بەڵکو بابەتێکی یاسایی و نێودەوڵەتییە کە پێویستە لە چوارچێوەی ڕێکەوتننامە و بنەماکانی یاسای نێودەوڵەتیدا هەڵبسەنگێنرێت.
ئەو ڕایگەیاند کە ئەنفالی بادینان تەنها ئۆپەراسیۆنێکی سەربازی نەبوو، بەڵکو بەشێک بوو لە پرۆسەیەکی پلان بۆ داڕێژراو کە تێیدا کوشتنی بەکۆمەڵی هاووڵاتیان، ڕاگواستنی زۆرەملێ، ونکردنی کەسان و بەکارهێنانی چەکی کیمیایی ڕوویداوە.
زێباری ئاماژەی بە ڕێکەوتننامەی نەتەوە یەکگرتووەکان لە ساڵی ١٩٤٨ سەبارەت بە ڕێگری و سزا دانی جینۆساید، ڕێکەوتننامەکانی جینێڤی ١٩٤٩ و بنەماکانی یاسای نێودەوڵەتی کرد و جەختی کردەوە کە پێویستە ئەم تاوانانە لە چوارچێوەی ئەو بەڵگە و ڕێکەوتننامانەدا هەڵبسەنگێنرێن.
ئەو هەروەها جەختی کردەوە کە بەدۆکیۆمێنتکردنی ئەنفال و پاراستنی بەڵگەکانی ئەم تاوانە تەنها بەرپرسیارێتییەکی ناوخۆیی نییە، بەڵکو کۆمەڵگەی نێودەوڵەتی و دامەزراوە نێودەوڵەتییەکانیش دەبێت بەردەوام بن لە ناساندن و پاراستنی یادەوەریی ئەم کارەساتە.
دکتۆر دیندار زێباری داوای کرد حکومەتی فیدڕاڵی عێراق بەرپرسیارێتییە یاسایی و دەستوورییەکانی خۆی جێبەجێ بکات و قوربانیانی ئەنفال و کەسوکاریان قەرەبوو بکاتەوە. ئەو هەروەها بانگەوازی کۆمەڵگەی نێودەوڵەتی کرد کە پشتگیری لە پرۆسەکانی دادپەروەری، بەرپرسیارکردن و قەرەبووکردنەوەی قوربانیان بکات.
لە کۆتاییدا، زێباری جەختی کردەوە کە پێویستە ئەنفال لە ئاستی نێودەوڵەتیدا بە شێوەیەکی دروست بناسرێت و لە یادەوەری نێودەوڵەتیدا بپارێزرێت، بۆ ئەوەی تاوانە گەورەکان لە داهاتوودا دووبارە نەبنەوە.
حکومەتی هەرێمی کوردستان بەردەوام دەبێت لە بەدۆکیۆمێنتکردنی ئەم تاوانانە و گەیاندنی دەنگی قوربانیانی ئەنفال بە ناوەندە نێودەوڵەتییەکان.