لە سنووری شارۆچکەی چۆمان، بەهۆی تەقینەوەی مینێک، هاووڵاتییەک بە ناوی “ڕەحیم وسو” کە دانیشتووی شارۆچکەی حاجی ئۆمەرانە، بە سەختی بریندار بوو. ڕووداوەکە لە کوێستانەکانی سنوورەکەدا ڕوویداوە و بەهۆی سەختیی برینەکەیەوە، گومان دەکرێت ناوبراو قاچێکی لەدەستدابێت.
محەمەد جەبار، بەڕێوەبەری نەخۆشخانەی چۆمان ڕایگەیاند، تیمەکانی تەندروستیی حاجی ئۆمەران دەستبەجێ ڕەوانەی شوێنی ڕووداوەکە کراون. ئێستا بریندارەکە لەژێر چاودێریی تیمی فریاگوزاریدایە و بۆ نەخۆشخانەی چۆمان دەگوازرێتەوە، پزیشکانیش هەموو ئامادەکارییەکی پێویستیان بۆ چارەسەرکردنی کردووە.
ئەم ڕووداوە جارێکی دیکە مەترسییەکانی مین و تەقەمەنییە نەبینراوەکانی ناوچە سنوورییەکانی هەرێمی کوردستانی بیر خستەوە. تیمە فریاگوزارییەکان لە کاتێکدا سەرقاڵی گواستنەوەی بریندارەکەن، هاووڵاتییانیش هۆشیار دەکرێنەوە لە کاتی هاتوچۆ لە ناوچە کوێستانییەکاندا زۆر وریای ئەو مەترسییانە بن.