دوێنێ دووشەممە، دۆناڵد ترەمپ، سەرۆکی ویلایەتە یەکگرتووەکانی ئەمریکا، ڕایگەیاند کە وڵاتەکەی خەریکی “گفتوگۆی باشە” لەگەڵ ئێران و دەرفەتێکی باش هەیە بۆ گەیشتن بە ڕێککەوتن. بەڵام هاوکات هۆشداریی دا کە ئەگەر دانوستانەکان ئەنجامیان نەبێت، هێرشە ئاسمانییەکانی ئەمریکا دەستپێدەکەنەوە.
ئەم لێدوانە گەشبینانەیەی ترەمپ لە کاتێکدایە کە تاران بە کردەوە ئاگربەستە کاتییەکەی ئەمریکای تاقی کردەوە؛ سعودیە، ئوردن و عێراق لە ڕۆژی دووشەممەدا ڕاپۆرتیان لەبارەی هێرشی درۆنیی گرووپە چەکدارەکانی سەر بە ئێران بڵاوکردەوە.
ترەمپ لە کۆبوونەوەیەکی جەماوەریدا لە ویلایەتی میشیگن ڕایگەیاند: “پێموایە دەرفەتێکی باش هەیە شتێک ڕووبدات، ئەگەر ڕوویدا باشە، ئەگەرنا دەگەڕێینەوە بۆ ئەو کارەی دوو ڕۆژ لەمەوبەر دەمانکرد.” هەروەها وتیشی: “تۆ ناتوانیت بەرتیلیان بدەیتێ، دەبێت لێیان بدەیت، ئێمە بە توندی لێیان دەدەین، بەڵام با ببینین چی دەبێت. لە ئێستادا دانوستانێکی زۆر دۆستانە لە ئارادایە.”
لە بەرامبەردا، ئیسماعیل باقایی، وتەبێژی وەزارەتی دەرەوەی ئێران، ڕایگەیاند کە پەیامەکان لە ڕێگەی نێوەندگیرەکانەوە ئاڵوگۆڕ دەکرێن، بەڵام ئەو دەنگۆیانەی کە دەڵێن ئێران داوای دانوستانی کردووە، بە “هەڵبەستراو” ناوبرد و وتی: “ئەمە لە ناو خوێنی (DNA) ئێمەدا نییە.”
سعوودیە ڕایگەیاند کە چەند درۆنێکیان خستووەتە خوارەوە کە ئامانجیان کێڵگە نەوتییەکانی ڕیاز بووە و لە عێراقەوە لەلایەن گرووپە چەکدارەکانی سەر بە ئێرانەوە ئاراستە کرابوون. هاوکات حوسییەکانی یەمەن ڕایانگەیاند کە هێرشیان کردووەتە سەر هێڵی بۆری نەوتی “ڕۆژهەڵات-ڕۆژئاوا”ی سعودیە وەک تۆڵەیەک بۆ هێرشە درۆنییەکانی سعودیە.
دوای وەستانی هێرشە ئاسمانییەکانی ئەمریکا و بڵاوبوونەوەی هەواڵی گفتوگۆکان، نرخی نەوت لە بازاڕەکانی جیهاندا بە شێوەیەکی بەرچاو دابەزی. نەوتی خاوی ئەمریکا بە ڕێژەی %8.21 دابەزی و گەیشتە 81.98 دۆلار، هەروەها نەوتی برێنت بە ڕێژەی %9.31 دابەزی و گەیشتە 87.77 دۆلار بۆ هەر بەرمیلێک.
ئەم گۆڕانکارییانە لە کاتێکدایە کە ترەمپ لە ناوخۆی ئەمریکا لەژێر فشاردایە. بەگوێرەی ڕاپرسییەکانی “ڕۆیتەرز/ئیپسۆس”، تەنها یەک لەسەر سێی ئەمریکییەکان پشتگیری لە شەڕی ئێران دەکەن، ئەمەش لە کاتێکدایە کە وڵاتەکە بەرەو هەڵبژاردنە نیوەدەورەییەکانی مانگی تشرینی دووەم دەچێت.
بەرپرسێکی ئەمریکی بە ڕۆیتەرزی ڕاگەیاندووە کە فەرماندە سەربازییەکان ئامۆژگاری ترەمپیان کردووە هێرشەکان ڕابگرێت، چونکە “ئامانجەکانیان بۆ بۆردومانکردن لێ بڕاوە” و مەترسی کەمبوونەوەی تەقەمەنییە ئاسمانییەکان لە ئارادایە. هەرچەندە ترەمپ ئەم دەنگۆیانەی ڕەتکردەوە و وتی سوپای وڵاتەکەی خەریکی پڕکردنەوەی کۆگاکانیەتی.
تا ئێستاش کێشەی سەرەکی لەسەر گەرووی هورمز بەردەوامە؛ واشنتن داوای هاتوچۆی ئازادانەی کەشتییەکان دەکات، بەڵام تاران دەڵێت دەبێت هاتوچۆ لەژێر چاودێری و مۆڵەتی ئەواندا بێت.