“فەرماندەیی ناوەندیی ئەمریکا” (سێنتکۆم) ڕایگەیاند: ئەمریکا بەندەرەکانی ئێرانی بەتەواوی گەمارۆ داوە و بازرگانیی دەریایی ئێران وەستاوە.
“سێنتکۆم” بە بڵاوکردنەوەی پەیامێک لە تۆڕی کۆمەڵایەتیی “ئێکس” ڕایگەیاند: لەسەدا ٩٠ی ئابووریی ئێران بە بازرگانیی دەریاییەوە بەستراوەتەوە و ئەمریکاش ڕایگرتووە.
ئەم دامەزراوەیە پێشتر وێنەیەکی کەشتیی جەنگیی “یو ئێس ئێس تریپۆلی” بڵاو کردبووەوە لە دەریای عەرەبدا جێگیرە و نیشانی دەدات: فڕۆکەیەکی شەڕکەری نەبینراوی “ئێف-٣٥ بی” لەم کەشتییەوە ئامادەی فڕینە.
بەپێی ڕاگەیەندراوی سێنتکۆم، ئەم کەشتییە بە نزیکەی سێ هەزار و ٥٠٠ دەریاوان و سەربازی دەریاییەوە، ئەرکی چاودێریکردنی کەشتییە هاتوو و چوووەکانی بەندەرەکانی ئێرانی لە ئەستۆدایە. ئەم فەرماندەییە جەختی کردەوە: ئەم هەنگاوە بۆ کەشتییەکانی سەرجەم وڵاتان بە یەکسانی جێبەجێ دەکرێت.
سێنتکۆم پێشتر ڕایگەیاندبوو: زیاتر لە ١٠ هەزار هێزی سەربازی، لەگەڵ زیاتر لە ١٢ کەشتیی جەنگی و دەیان فڕۆکە، لە ئۆپەراسیۆنی کۆنترۆڵکردنی هاتووچۆی دەریایی لە دەوروبەری بەندەرەکانی ئێراندا بەشدارن.
بەپێی ڕاگەیەندراوی ئەم دامەزراوەیە، لە ماوەی شەو و ڕۆژی یەکەمی جێبەجێکردنی ئەم ئۆپەراسیۆنەدا، هیچ کەشتییەک بەم ناوچەیەدا تێپەڕ نەبوو و شەش کەشتیی بازرگانیش بە فەرمانی هێزە ئەمریکاییەکان ئاراستەی خۆیان گۆڕی و بۆ یەکێک لە بەندەرەکانی ئێران لە کەنداوی عومان گەڕانەوە.
سێنتکۆم جەختی کردەوە: هێزە ئەمریکاییەکان پشتیوانی لە ئازادیی کارکردنی ئەو کەشتییانە دەکەن لە گەرووی هورمزەوە بەرەو بەندەرە نائێرانییەکان تێپەڕ دەبن.
هاوکات، وەزارەتی گەنجینەی ئەمریکا ڕایگەیاند: زۆرترین گوشاری ئابووری دژی حکوومەتی ئێران بەردەوام دەبێت و ئەو دامەزراوە داراییانەی پشتیوانی لە تاران دەکەن، سزا دەدرێن.
دۆناڵد ترەمپ، سەرۆککۆماری ئەمریکا، گوتوویەتی: لەوانەیە لە ماوەی دوو ڕۆژی داهاتوودا پێشهاتی نوێ لە پایتەختی پاکستان ڕوو بدات. ناوبراو هەروەها گوتی: دژی پێشنیازی هەڵپەساردنی ٢٠ ساڵەی پیتاندنی یۆرانیۆمە لە ئێران. پێشنیازێک شاندی ئەمریکایی بە لایەنی ئێرانیی پێشکەش کردبوو.
پاکستان وەک نێوەندگیر لە نێوان تاران و واشنتۆن، ڕایگەیاندووە: لەسەر هەوڵەکانی بۆ بەڕێوەچوونی خولی دووەمی دانوستانەکان و پاراستنی ئاگربەستی کاتی بەردەوام دەبێت.
هەواڵی پێشوو