لە کاتێکدا جیهانی تۆپی پێ چاوەکانی لەسەر ڕووداوەکانی مۆندیالی 2026ە، هەواڵە گەرمەکانی گواستنەوەی یاریزانان کێبڕکێی مۆندیال دەکەن. میدیا بەریتانییەکان ئاشکرایان کردووە کە برادلی بارکۆلای ئەستێرەی لاوی فەڕەنسی و یانەی پاریس سان جێرمان، بڕیاری کۆتایی خۆی سەبارەت بە داهاتووی لە بازاڕی گواستنەوەی هاوینەی ئەمساڵدا داوە.
بەپێی زانیارییەکانی ڕۆژنامەی دەیلی مەیل، ئەم یاریزانە کە ئێستا لەژێر سەرپەرشتی دێدیێ دیشام لە مۆندیالدا دەدرەوشێتەوە، ڕووکردنە خولی نایابی ئینگلیزی بە ئامانج گرتووە و ئارسناڵی بەسەر لیڤەرپوولدا هەڵبژاردووە. بارکۆلا بە فەرمی ڕایگەیاندووە کە گەنەرز بژاردەی یەکەمیەتی و دەیەوێت درێسی ئەو یانەیە لەبەر بکات.
ئەم بڕیارەی بارکۆلا بێ هۆکار نییە و بەپێی هەمان سەرچاوە، دوو هۆکاری سەرەکی پشتی ئەم بڕیارە دەگرن. هۆکاری یەکەم سەرسامی و متمانەی تەواوی یاریزانەکەیە بە پڕۆژە وەرزشییە بەهێزەکەی مایکڵ ئارتێتا، کە توانیویەتی ئارسناڵ بکاتە پاڵەوانی پرێمەرلیگ و ببێتە وێستگەیەکی سەرنجڕاکێش بۆ بەهرەدارترین یاریزانانی جیهان.
لە لایەکی دیکەشەوە، هۆکارێکی کۆمەڵایەتی و کەسی ڕۆڵێکی گرنگی بینیوە، ئەویش ئارەزووی خۆی و خێزانەکەیەتی بۆ ئەزموونکردنی ژیان لە شاری لەندەنی پایتەخت.
ئەم دوو خاڵە وایان کردووە ئارسناڵ لە پێشەنگی کێبڕکێی گواستنەوەی ئەم بەهرەمەندە فەڕەنسییەدا بێت و پێشبینی دەکرێت دەستبەجێ دوای کۆتاییهاتنی مۆندیال، گفتوگۆکان بۆ ئەنجامدانی ئەم گرێبەستە بە فەرمی دەست پێ بکات.