ڕێبەرایەتی ناوەندی هێزەکانی ئەمریکا (سێنتکۆم) بەرەبەیانی ئەمڕۆ شەممە ڕایگەیاند شەوی حەوتەمی هێرشە سەربازییەکان بۆ سەر ئێران کۆتایی هاتووە. لە هەمان کاتدا، تەلەفزیۆنی ئێران هەواڵی کوژرانی ٣ کەس و برینداربوونی ٨ کەسی دیکەی بڵاوکردەوە، بەهۆی هێرشەکانی ئەمریکا بۆ سەر پارێزگای هورمزگان.
سێنتکۆم لە ڕاگەیەندراوێکدا ئاماژەی بەوە کرد کە هێرشەکان ئامانجی شوێنەکانی چاودێری، دامەزراوە سەربازییەکان، کۆگاکانی چەکی ژێرزەوی و تواناکانی دەریایی ئێران بوون. هێرشەکان بە بەکارهێنانی فڕۆکەی شەڕکەر، فرۆکەی بێ فڕۆکەوان (درۆن)، کەشتی شەڕ و هێزی سەربازی دیکە ئەنجام دراون.
سێنتکۆم هەروەها لە پەیامێکدا لەسەر پلاتفۆرمی “ئێکس” ڕایگەیاند کە ئەم هێرشانە بە فەرمانی سەرکردەی باڵای هێزە چەکدارەکانی ئەمریکا ئەنجام دراون و ئامانجیان کەمکردنەوەی توانای سەربازی ئێرانە.
لە لایەکی دیکەوە، ئاژانسی ئەسۆشیەتد پرێس بە گوێرەی ئامارەکانی وەزارەتی بەرگری ئەمریکا (پێنتاگۆن) ڕاپۆرتی دا کە ژمارەی سەربازە ئەمریکییە بریندارەکان لە ئەنجامی شەڕ لەگەڵ ئێران، لە دووشەممەوە تا ئێستا، گەیشتووەتە ١٣ سەرباز.
لە ئێران، ئاژانسی تەسنیم هەواڵی بیسترانی دەنگی تەقینەوە لە شاری بەندەر عەباس و دەوروبەری شاری جاسک لە پارێزگای هورمزگان بڵاوکردەوە. هەروەها، ئاژانسی فارس ڕایگەیاند کە هێزەکانی ئەمریکا سێ پرد و تێنێلیان لە هەمان ناوچە بۆردومان کردووە.
بەپێی تەسنیم، بەڕێوەبەری گشتی کۆمپانیای ئاوەکانی هورمزگان ڕایگەیاند هێرشێکی ئەمریکا بۆ سەر بنکەی پاککردنەوەی ئاوی بۆنجی لە جاسک، هۆکاری بڕانی ئاو لە ٢٠ گوند بووە کە نزیکەی ١٠ هەزار هاوڵاتی تێدا دەژین.
لە هەمان کاتدا، دەسەڵاتدارانی پارێزگای هورمزگان ڕایانگەیاند کە هێزی ئەمریکا ناوچەیەکی دوورگەی هورمزیان کردووەتە ئامانج. لە دوای ئەو هێرشانەش، ژمارەیەک ڕێگا و تەوەرە هاتووچۆیەکان لە پارێزگاکە داخراون.
بەپێی تەسنیم، ڕێگای نێوان بەندەر عەباس و ڕودان بەهۆی هێرشێک بۆ سەر دوو پرد زیانی پێگەیشتووە. هەروەها، بەرپرسی پارێزگاکە بە ئاژانسی ئیسنا وتووە کە دەزگا پەیوەندیدارەکان ئێستا کاری چاکسازی و نۆژەنکردنەوەی بنەماکانی هاتووچۆ لە ناوچەکەدا بەردەوامن.