سەرەڕای ئەوەی ژەمی بەیانیان بە یەکێک لە گرنگترین ژەمەکانی ڕۆژ دادەنرێت، بەڵام هەندێک خۆراک و خواردنەوە کە زۆر کەس لە بەیانیاندا ڕاهاتوون بیانخۆن، ڕەنگە بژاردەیەکی تەندروست نەبن بۆ خواردن بە گەدەی خاڵی. ئەم جۆرە خۆراکانە لای هەندێک کەس دەبنە هۆی تێکچوونی کۆئەندامی هەرس یان زیادبوونی ترشەڵۆکی گەدە. شارەزایانی بواری خۆراک هۆشداری دەدەن لە زۆر خواردنی هەندێک بژاردە لە بەیانیاندا پێش خواردنی هەر شتێکی تر، و چەند جێگرەوەیەک پێشکەش دەکەن کە یارمەتیدەرن بۆ دەستپێکردنی ڕۆژەکە بە شێوازێکی هاوسەنگتر.
1. شیر
سەرەڕای ئەوەی شیر یەکێکە لە بژاردە باوەکانی سەر مێزی نانی بەیانی، بەڵام خواردنەوەی بە گەدەی خاڵی ڕەنگە لای هەندێک کەس ببێتە هۆی هەستکردن بە قورسی، سووتانەوەی گەدە (ترشەڵۆک) و تێکچوونی کۆئەندامی هەرس. شارەزایان ئامۆژگاری دەکەن کە شیر لە ناو ژەمێکی تەواوکارییدا بخورێتەوە، وەک زیادکردنی بۆ ناو شۆفان یان خواردنی لەگەڵ چەرەسات، بۆ ئەوەی یارمەتی باشترکردنی پرۆسەی هەرسکردن بدات.
2. میوە
میوەکان بەوە ناسراون کە دەوڵەمەندن بە ڤیتامین و ڕیشاڵەکان، بەڵام خواردنیان بە تەنیا و بە گەدەی خاڵی ڕەنگە ببێتە هۆی باکردن و غازاتی سک لای هەندێک کەس، بەتایبەت ئەو کەسانەی حەساسییەتیان بە جۆرە دیاریکراوەکانی میوە هەیە. هەروەها بەهۆی خێرا مژینی شەکرەکەیانەوە، لەوانەیە دوای ماوەیەکی کورت هەست بە برسییەتی بکەنەوە، بۆیە باشتر وایە لەگەڵ ماست، چەرەسات یان تۆوەکاندا بخورێن بۆ زیادکردنی هەستی تێربوون و خاوکردنەوەی مژینی شەکرەکان.
3. قاوەی ڕەش
زۆر کەس ڕۆژەکەیان بە فنجانێک قاوە دەست پێدەکەن، بەڵام خواردنەوەی قاوەی ڕەش بە گەدەی خاڵی ڕەنگە ترشەڵۆکی گەدە زیاد بکات یان نیشانەکانی گەڕانەوەی ترشەڵۆک (ڕیفلێکس) لای هەندێک کەس خراپتر بکات. هەروەها دەکرێت ببێتە هۆی دڵەڕاوکێ یان لەرزین لای ئەو کەسانەی حەساسییەتیان بە کافاین هەیە، بۆیە ئامۆژگاری دەکرێت پێش خواردنەوەی قاوە سووکەژەمێک بخورێت یان شیر بۆ قاوەکە زیاد بکرێت تا کاریگەرییەکەی لەسەر گەدە کەم بێتەوە.