فراکسیۆنی پارتی دیموکراتی کوردستان لە ئەنجوومەنی نوێنەرانی عێراق بە توندترین شێوە پەلامارە درۆنییەکەی سەر نووسینگەی تایبەتی مەسرور بارزانی، سەرۆکی حکوومەتی هەرێمی کوردستان و شوێنی حەوانەوەی بەڕێوەبەری ئاژانسی پاراستنی لە قەزای پیرمام ئیدانە کرد. فراکسیۆنەکە ئەم هێرشەی بە بەزاندنی ئاشکرای بەها نیشتمانییەکان و رەفتارێکی مەترسیدار بۆ تێکدانی ئارامی و سەقامگیری وەسف کرد.
بەپێی راگەیەندراوێکی دژەتیرۆری کوردستان، کاتژمێر 12:28ـی بەرەبەیانی ئەمڕۆ دووشەممە (17ـی ئابی 2026)، دوو درۆنی بۆمبڕێژکراو لە جۆری (حەدید-110) لە دیوی سنووری ئێرانەوە ئاراستەی بارەگای نووسینگەی تایبەتی سەرۆکوەزیران و شوێنی حەوانەوەی بەڕێوەبەری ئاژانسی پاراستن کراون، بەڵام خۆشبەختانە هیچ زیانێکی گیانییان لێ نەکەوتووەتەوە.
لە بەرامبەردا فراکسیۆنی پارتی جەختی لەوە کردووەتەوە کە هەرێمی کوردستان هەمیشە فاکتەری سەقامگیری بووە و هەوڵی داوە تەواوی عێراق لە ململانێ ناوچەیییەکان بەدوور بێت. هاوکات داوای لە حکوومەتی فیدراڵ کردووە بەرپرسیارێتییە دەستووری و ئەمنییەکانی هەڵبگرێت و بە بڕیاری کرداری و تووند سنوورێک بۆ ئەم دەستدرێژییانە دابنێت.
دژەتیرۆری کوردستان و فراکسیۆنی پارتی جەختیان کردەوە کە ئەم جۆرە هێرشانە بە هیچ شێوەیەک مایەی قبووڵکردن نین و تەواوی بەرپرسیارێتیی لێکەوتە ئەمنی و سیاسییەکانی لە ئەستۆی ئەنجامدەرانیدایە.