بازاڕی تەواوکەرە خۆراکییەکان پڕییەتی لەو بەرهەمانەی بەڵێنی خەوی باشتر، پێستی گەشاوەتر، بەهێزکردنی ماسولکەکان یان باشکردنی مەزاج دەدەن. بەڵام توێژینەوە نوێیەکان و ڕێنمایی پزیشکان ئاماژە بەوە دەکەن کە بەکارهێنانی بەردەوام و بێ کۆنتڕۆڵی هەندێک لەم تەواوکەرە گیایی و دەرمانییانە، دەبێتە هۆی تێکدانی هاوسەنگیی هۆڕمۆنەکان و دابەزینی بەرچاو لە ئارەزووی سێکسیدا.
وردەکاریی ۴ تەواوکەرە گیایی و خۆراکییەکە
۱. ڕەگی بەیبوون (Licorice Root):
بە شێوەیەکی باو بۆ چارەسەری ئاریشەکانی هەرس، ئێشی گەروو و کۆکە بەکاردێت.
توێژینەوەکان نیشانی دەدەن کە ئاوێتەکانی ناو ڕەگی بەیبوون، ئەنزیمەکانی دروستکەری هۆڕمۆنی تێستۆستێڕۆن بلۆک دەکەن.
ئەم پرۆسەیە ئاستی تێستۆستێڕۆن کەمدەکاتەوە و هاوسەنگیی هۆڕمۆنی جەستە تێکدەدات کە ڕاستەوخۆ کارپێکەری دابەزینی ئارەزووی سێکسییە.
۲. میلاتۆنین (Melatonin – تەواوکەری خەو):
بە فراوانی بۆ چارەسەری بێخەوی و ڕێکخستنی کاتی خەوتن بەکاردێت.
بەکارهێنانی بڕی بەرز (بۆ نموونە سەروو ۲۰ میلیگرام) کاریگەریی نەرێنی لەسەر تەوەری (هیپۆتالامۆس-هیپۆفیز-گۆناد) دادەنێت کە بەرپرسە لە ڕێکخستنی هۆڕمۆنە سێکسییەکان.
ئەم ژەمە بەرزانە لە ڕێگەی سەرکوتکردنی هۆڕمۆنەکانی زاوزێ وەک (LH)، ئارەزووی سێکسی کەم دەکەنەوە.
۳. نەمامی دارخورمای زیوی (Saw Palmetto):
بە شێوەیەکی سەرەکی لەلایەن پیاوانەوە بۆ ڕێگری لە هەڵوەرینی قژ و سووککردنی نیشانەکانی گەورەبوونی پرۆستات بەکاردێت.
ئەم تەواوکەرە کار دەکات لەسەر بلۆککردنی ئەنزیمێک کە تێستۆستێڕۆن دەگۆڕێت بۆ دیهیدڕۆتێستۆستێڕۆن.
لە هەندێک حاڵەتدا، ئەم تێکچوونە هۆڕمۆنییە دەبێتە هۆی دابەزینی ئاستی تێستۆستێڕۆنی سەربەست لە جەستەدا و دابەزینی ئارەزووی سێکسی.
4. گیای چای شاخاوی (St. John’s Wort):
بۆ باشکردنی مەزاج و چارەسەری خەمۆکیی سووک بەکاردێت.
کاریگەرییە لاوەکییەکانی لەسەر سێکس هاوشێوەی دەرمانە کیمیاییەکانی دژی خەمۆکییە؛ وەک دروستکردنی ئاریشە لە ڕەپبوون، دواکەوتنی ئۆڕگازم و دابەزینی ئارەزووی سێکسی.
تێکچوونی دەرمانی: ئەم گیایە تێکچوونی دەرمانیی مەترسیدار دروست دەکات؛ لەوانە کەمکردنەوەی کاریگەریی حەبی ڕێگری لە دووگیانی و تێکچوون لەگەڵ دەرمانەکانی دژی هەستیاری و ئازارشکێنەکان.
تێبینی پزیشکی: پسپۆڕانی تەندروستی جەخت دەکەنەوە کە پێش دەستپێکردنی بەکارهێنانی بەردەوامی هەر تەواوکەرێکی گیایی یان خۆراکی، بەتایبەت کاتێک دەرمانی دیکە بەکاردێنیت، پێویستە ڕاوێژ لەگەڵ پزیشک یان دەرمانساز بکرێت.