توێژینەوەیەکی نوێی تۆڕی جیهانیی پەڕگیری و تەکنەلۆژیا (GNET) ئاشکرای دەکات کە لەم ساڵانەی دواییدا تۆڕە کۆمەڵایەتییەکانی وەک تیکتۆک و یوتیوب بە بڕێکی زۆر ناوەڕۆکی بێکوالێتی، دووبارەبووەوە و توندوتیژ کە بە ژیریی دەستکرد (AI) دروستکراون پڕبوونەتەوە. ئەم ناوەڕۆکانە کە بە تایبەتی ڕوویان لە منداڵانە، کارگەریی خراپیان لەسەر کەمبوونەوەی توانای ناسینەوە (درک) و گەشەی توندوتیژی لە دەرونی منداڵاندا دروستکردووە.
دیاردەی «سلاپ» (AI Slap) و پووکانەوەی مێشک:
ناوەڕۆکی “سلاپ” بەو ڤیدیۆ و بابەتانە دەوترێت کە بە ڕێژەیەکی زۆر، بە بێکوالێتی و بە بێ هیچ دەستێوەردانێکی مرۆیی بە ژیریی دەستکرد دروست دەکرێن و تەنها ئامانجیان بەدەستهێنانی بینەر و داهاتی ڕیکلامە.
ئەم پرۆسەیە دەبێتە هۆی دیاردەیەک کە پێی دەوترێت “پووکانەوەی مێشک” (Brain Rot)، کە بریتییە لە شوێنەوارە دەروونییەکانی سەیرکردنی بەردەوام و لەڕادەبەدەری ناوەڕۆکی خێرا، پووچ و بێمانا بۆ بەدەستهێنانی کۆمەڵێک دۆپامینی خێرا لە مێشکدا.
بەکارهێنانی بەرنامە هەرزان و ئاسانەکانی وەک PixVerse، VeoE.ai، Media.io و Sora هۆکاری سەرەکیی تەقینەوەی ئەم ناوەڕۆکانەن.
میوە کارتۆنییەکان؛ ڕووکارێکی بێ زیان بۆ بڵاوکردنەوەی ئایدۆلۆژیای توندوتیژ:
توێژینەوەکە ئاماژە بەوە دەکات ڤیدیۆی میوە کارتۆنییە دروستکراوەکان بە ژیریی دەستکرد کە سەرنجڕاکێشن، بوونەتە ئامرازێکی شاراوە بۆ توندوتیژیی دەروونی، ناپاکی، شەڕی خێزانی و بەرەوپێشبردنی توندڕەوی.
لە بەشێک لەم ڤیدیۆیانەدا دیمەنی ئەشکەنجەدان، پارچەپارچەکردن و کوشتنی خەیاڵی بە چەک نیشان دەدرێت، کە ئەمەش هەستیاریی منداڵان بەرامبەری توندوتیژی دادەبەزێنێت (کەمی دەکاتەوە).
شاردنەوەی پەیامی گرووپە توندڕەوەکان:
بەشێک لەم ناوەڕۆکانە نیشانەی گرووپە پەڕگیرەکان یان ڕێکخراوە تیرۆریستییەکان کۆپی دەکەنەوە. بۆ نموونە کارەکتەرێکی کارتۆنی بە ناوی “گۆزەری خەلیفە” بە سوپایەک دەڵێت: «دەوڵەتی گێزەر دووبارە سەرهەڵدەداتەوە»، کە وەک هاوشێوەی دروشمەکانی گرووپی داعش داڕێژراوە.
تێکچوونی سیستەمی فلتەرکردنی تۆڕە کۆمەڵایەتییەکان:
هەرچەندە پلاتفۆرمەکانی وەک تیکتۆک ڕێنماییان بۆ سنووردارکردنی توندوتیژی هەیە، بەڵام دروستکەرانی ئەم ناوەڕۆکانە لە ڕێگەی شاردنەوەی پەیامە توندڕەوەکان لە پشت وێنەی کارتۆنیی میوەکان، بە ئاسانی ئەم فلتەرانە دەبڕن و دەگەنە دەست ملیۆنان منداڵ لە سەرانسەری جیهاندا.