لە نووسراوێکدا، کە لە 8ی 5ی 2024، لە وەزارەتی خوێندنی باڵا و توێژینەوەی زانستیی هەرێمی کوردستان دەرچووە ، داوا لە گشت زانکۆ حکوومییەکان کراوە، ناو و زانیاریی سێ یەکەمەکانی ساڵانی 2017 بۆ 2018 تاوەکوو ساڵی 2022 بۆ 2023، بنێرن.
بەپێی نووسراوەکە، دەبێت لەم هەفتەیە ناوەکان بنێردرێنەوە وەزارەتەکە.
داوا کراوە ناوی چواریی یەکەمەکان، لەگەڵ ناوی زانکۆ و کۆلیژ و بەش و جۆری بڕوانامە و ساڵی دەرچوون و بڕی مووچە و ناونیشانیان بنێردرێ.
د. توانا نه‌جه‌ف، به‌ڕێوه‌به‌ری گشتیی دیوانی وه‌زاره‌تی خوێندنی باڵا و توێژینه‌وه‌ی زانستی رایگەیاند: “ناوی یەکەمەکانی زانکۆی ئەو چەند ساڵەمان کردووە، بۆ ئەوەی بزانین چەند پارە بۆ دامەزراندنیان پێویستە و ناوەکانیش بۆ بەغدا دەنێرین.”
ئاماژەی بەوەش دا: “ژمارەی ئەو یەکەمانە زیاتر لە 10 هەزار کەسە و لە هەوڵداین بۆ دامەزراندنییان.“
توانا نه‌جه‌ف ئاشکراشی کرد، سبەی رۆژی یەکشەممە 12ی ئایار، بۆ هەمان پرس کۆبوونەوەیەک لە وەزارەتی خوێندنی باڵا بە بەشداریی بەڕێوەبەری تۆماری گشتیی زانکۆ حکوومییەکان بەڕێوە دەچێت
تاوەکوو ئێستا سێ یەکەمەکانی زانکۆ حکوومییەکانی چەند ساڵێک لە لایەن هەرێمی کوردستان دامەزرێندراون.
شوان بەرزنجی