ئەمڕۆ سێشەممە، 25ی ئابی 2026، لەگەڵ بەردەوامیی مامەڵەکان لە بازاڕەکانی وزەدا، نرخەکانی نەوت لە جیهاندا دابەزینێکی بەرچاو و هەستپێکراویان تۆمارکرد، بە جۆرێک نەوتی برێنت ئاستی پشتیوانیی 90 دۆلاری دەستبەردار بوو.
ئەم پاشەکشەیەی نرخەکان دوای ئەوە هات کە شەپۆلێکی فرۆشتنی گرێبەستەکان لەلایەن بازرگانانەوە ڕووی لە بازاڕ کرد بۆ چنینی قازانجەکانی دوێنێ، هاوکات لەگەڵ سەرهەڵدانی هەندێک ئاماژەی هێوربوونەوەی کاتی لە ئاڵۆزییەکانی تەنگەی هورمزدا، کە وایکرد دڵگرانییەکانی وەبەرهێنەران بەرامبەر ڕاگرتنی گواستنەوەی خاو تا ڕادەیەک ڕەوێنرێتەوە.
لە گۆڕانکارییەکانی ئەمڕۆی بازاڕدا، نرخی هەر بەرمیلێک نەوتی خاوی برێنت پاشەکشەی توندی بەخۆوە بینی و نیشتەوە سەر 89.87 دۆلار، کە بەراورد بە ئاماری دوێنێ (93.13 دۆلار) بە بڕی 3.26 دۆلار دابەزیوە. هاوكات، نرخی هەر بەرمیلێک نەوتی خاوی سووکی تەکساسی ئەمریکیش بە هەمان شێوە دابەزینێکی بەهێزی تۆمارکرد و گەیشتە 82.79 دۆلار، کە بەراورد بە ئاماری پێشوو (85.64 دۆلار) بە بڕی 2.85 دۆلار ئاستەکەی دابەزیوە.
ئەم داڕژانەی نرخەکان دەریخست کە بازاڕی جیهانیی وزە بەرامبەر بچووکترین گۆڕانکاری لە ئاراستەی ڕووداوەکانی ناوچەکە و هێوربوونەوەی ڕەوشی تەنگەی هورمز حەساسە و بە خێرایی وەڵامی هەواڵەکان بە ئاڕاستەی خوارەوە دەداتەوە.