ستۆکهۆڵمی سوێد ئامادەکاری دەکات بۆ پێشوازیکردن لە فێستیڤاڵێک تایبەت بە کولتوور و کەلەپووری کوردی بە بەشداریی ژمارەیەک لە هونەرمەندان و چێشتلێنەرە بە ئەزموونەکان.
ئەم چالاکییە ڕۆژی شەممەی داهاتوو دەستپێدەکات و تیشک دەخاتە سەر لایەنە جیاوازەکانی کەلەپووری کوردی لە ڕێگەی بەرنامەیەکی دەوڵەمەند کە موزیک و گۆرانی و خواردنە نەریتییەکان کۆدەکاتەوە.
10 هونەرمەند بەشداری تێدا دەکەن لەوانە نەجمەدینی غوڵامی، ئەیاد حوسێن، سامان پیانۆ، حەمید عوسمان، ڕەوەند ئازاد و هونەر محەممەد و ژمارەیەک هونەرمەندی دیکە.
فیستیڤاڵەکە بەردەوام ئامانجی کۆکردنەوەی پێكهاتە جیاوازەکانە و تەنیا بۆ ڕەوەندی کوردی نییە، بەڵکو دەیەوێت خەڵکی سوێدی، عەرەب، ئێرانی و تورک بەلای خۆیدا ڕابکێشێت.
ڕێکخەران لەو بڕوایەدان ئەم بۆنەیە دەبێتە دەروازەیەک بۆ پەیوەندی کولتووری و ناساندنی مێژوو و دابونەریتی کوردی لە دەرەوەی وڵات.