حکوومەتی ئوردن ڕۆژی سێشەممە (٢٧ی ئۆکتۆبەر) ڕای گەیاند لە هێرشەکانی فڕۆکە جەنگییەکانی ئەو وڵاتەدا شەوی دووشەممە ٢٦ی ئۆکتۆبەر کە کرانە سەر پێگەگەلێک لە باشووری سووریا، زیاتر لە ٢٠ ئەندامی گرووپی داعش کوژراون.
ئەم ئۆپەراسیۆنە لە وەڵامی هێرشەکەی ڕۆژی هەینی بوو بۆ سەر کڵێسایەکی ئۆرتۆدۆکسی یۆنانی لە پارێزگای کەرەک لە باشووری ئوردن، کە ٩ کوژراو و دەیان برینداری لێ کەوتبووەوە. بەرپرسانی ئەمنیی ئوردن ڕۆژی دووشەممە هەروەها ڕایانگەیاند سێ گومانلێکراویان دەستگیر کردووە بە تۆمەتی دەست هەبوون لەم هێرشەدا، دوای پێکدادانی چەکداری لەگەڵ هێزە ئەمنییەکان.
محەممەد موومنی، وەزیری پەیوەندییەکانی حکوومەتی ئوردن، ڕۆژی سێشەممە لە تۆڕی کۆمەڵایەتیی ئێکس ڕای گەیاند هێزی ئاسمانیی ئەو وڵاتە لە ئۆپەراسیۆنەکەدا دژی پێگەکانی گرووپی داعش لە باشووری سووریا، زیاتر لە ٢٠ کەس لە ئەندامانی ئەم گرووپەی کوشتووە.
بە گوتەی ئەو، سوپای ئوردن لە پلاندانانی هێرشەکاندا هەوڵی داوە خۆی بە دوور بگرێت لە ئامانج گرتنی ناوچە مەدەنییە ناسراوەکان.
لە کاتێکدا ئوردن هەواڵی کوژرانی زیاتر لە ٢٠ ئەندامی داعش ڕادەگەیەنێت، بەرپرسانی سووری دەڵێن هێرشە ئاسمانییەکان بەر ناوچە نیشتەجێبوونەکانیش کەوتوون.
بە پێی ڕاپۆرتەکانی دامەزراوە مرۆییەکانی سووریا، لانی کەم حەوت هاووڵاتیی سڤیل لە ناوچەکانی باشووری ئەو وڵاتە، لەوانە پارێزگاکانی دەرعا و سوەیدا، کوژراون. دەگوترێت سێ منداڵ و ژنێکیش لە نێو قوربانییەکاندا هەن.
ڕاپۆرتە بڵاوکراوەکان باس لە کوژرانی چەند ئەندامێکی خێزانێک دەکەن لە یەکێک لە ناوچە گوندنشینەکانی دەرعا.
میدیا سوورییەکان لە ڕاپۆرتە سەرەتاییەکاندا ئاماری جیاوازیان لەبارەی قوربانییەکانەوە، لەوانە هەشت کوژراو، بڵاو کردبووەوە.
محەممەد موومنی لە کاردانەوە بە ڕاپۆرتی قوربانییانی سڤیل پەشیمانیی دەربڕی، بەڵام جەختی کردەوە ئامانجەکانی ئۆپەراسیۆنەکە، پێگەکانی گرووپە چەکدارەکان بوونە.