شەوی یەکشەممە، شانۆگەریی “ئیمپراتۆریەتی هەیاس”،لە نووسینی د. محەممەد عەلی عوزێری و دەرهێنانی د. ژیلوان تاهیر لە هەولێر نمایشکرا.
نمایشەکە بە ئامادەبوونی زەعیم عەلی، ئەندامی مەکتەبی سیاسی پارتی دیموکراتی کوردستان، ئومێد خۆشناو پارێزگاری هەولێر، ئەحمەد کانی، ئه‌ندامى کۆمیتەی ناوەندی پارتی دیموکراتی کوردستان و بەرپرسی بەشی دیراسات و پێگەیاندن، ئەندازیار کارزان عەبدولهادی، سەرۆکی شارەوانیی هەولێر و سیروان عوسمان بەڕێوەبەری گشتیی ڕۆشنبیری و هونەری هەولێر و ژمارەیەکی بەرچاو لە هونەرمەندان و جەماوەری شانۆ لە هۆڵی ڕۆشنبیریی هەولێر پێشکەش کرا.
“ئیمپراتۆریەتی هەیاس” لە چوارچێوەی چالاکییە هونەرییەکانی وەرزی پایزە و بە هەماهەنگیی بەڕێوەبەرایەتیی گشتیی ڕۆشنبیری و هونەری هەولێر، بەڕێوەبەرایەتی سینەما و شانۆی هەولێر و سەرۆکایەتیی شارەوانیی هەولێر، پێشکەش کرا.
نمایشەکە، گەشتێکی هونەرییە بۆ ناو یادەوەرییە کۆنەکانی هەولێر و هەولێرییەکان، کە بە زمانێکی شانۆیی، وێنەیەک لە ژیان، مێژوو و یادەوەرییە کۆمەڵایەتییەکانی شارەکە دەخاتەڕوو و بەشێک لە ڕابردووی ئەم شارە زیندوو دەکاتەوە و لەلایەن ژمارەیەک ئەکتەری دیاری بواری شانۆ پێشکەش کرا.