وتەبێژی بەڕێوەبەرایەتی بەرگری شارستانی سۆران رایگەیاند، کە لە ماوەی نزیكەی حەوت مانگی ڕابردووی ئەمساڵ 2024 تا ئێستا 11 كەس لە سنووری ئیدارەی سەربەخۆی سۆران خنكاون.
رائید ڕەوەند هاودیانی، وتەبێژی بەڕێوەبەرایەتی بەرگری شارستانی سۆران، بە ئاژانسی هەواڵی زاگرۆسی راگەیاند لە ماوەی نزیكەی حەوت مانگی ڕابردووی ئەمساڵ 2024 تا ئێستا 11 كەس لە سنووری ئیدارەی سەربەخۆی سۆران خنكاون، لەوانە 9 كەس لە ڕووبار و سەرچاوە ئاوییەكان و 2 كەسیش لە نێو حەوزدا خنكاون، توانراوە تەرمی 10 كەس لەو خنكاوانە بدۆزرێتەوە، تەنها تەرمی كچێكی تەمەن 14 ساڵ تا ئێستا لە ڕووباری چۆمان چارەنووسی نادیارەو نەدۆزراوەتەوە”.
هەروەها رائید ڕەوەند هاودیانی، وتەبێژی بەڕێوەبەرایەتی بەرگری شارستانی سۆران ئەوەشی بۆ ئاژانسی هەواڵی زاگرۆس خستەروو، کە داوا لە هاووڵاتییان ڕوو لەم ڕووبارو شوێنانە نەكەن كە مەترسیدارن بۆ مەلەكردن، هەروا داواش لە دایك و باوكان دەكات، ئاگاداری منداڵەكانیان بن لەكاتی مەلە كردندا.
رێباز یونس