ئەمڕۆ چوارشەممە، 25ـی ئەیلوولی 2024، شێخ نیاز ڕاغب نەقشبەندی، بەڕێوەبەری گشتی دەستەی حەج و عومرەی هەرێمی کوردستان، لە کۆنفرانسێکی ڕۆژنامەوانیدا گوتی: بە ئامادەبوونی لیژنەیەک تیروپشک بۆ ناوی حاجیانی ئەمساڵ دەکرێت.
ئاماژەی بەوەشکرد، تیروپشکەکە بۆ ئەو هاووڵاتیانە دەکرێت کە لە ساڵی 2017 و 2023 فۆڕمیان پڕکردووەتەوە، دەشڵێت: ئەم ساڵ هیچ ناونووسینێک بۆ هاووڵاتیان نەکراوە بۆ گەشتی حەج.
نیاز نەقشبەندی ڕاشیگەیاند، ژمارەی ئەوانەی تیروپشکیان بۆ دەکرێت، بریتییە لە 117 هەزار و 120 هاووڵاتی، هەروەها توانراوە پشکی حاجیانی هەرێمی کوردستان زیاد بکرێت، کە لە دوو ساڵی ڕابردوو پشکی حاجیانی هەرێم 4685 پشکمان هەبوو، بەڵام ئەمساڵ بووەتە 5120 پشک.
بەڕێوەبەری گشتی دەستەی حەج و عومرەی هەرێمی کوردستان دووپاتی کردەوە، “لەو پشکانە ژمارەیەک پشک بۆ موڕشیدانی ئاینی و تیمی پزیشکی و کەسوکاری شەهیدان و گرووپی ئیداری سەرپەرشتی پرۆسەی حەج و شؤفێرانی پاس تەرخان دەکرێت، کە 72 پشک تەنیا بۆ شۆفێرانی پاسەکانە، بۆیە ئەوەی دەمێنێتەوە کە ئێمە تیروپشکیان بۆ بکەین بریتییە 4513 پشک.