کابینەی حکومەتی تورکیا بە سەرۆکایەتی ئەردۆغان کۆدەبێتەوە و یەکێک لە باسەکانی کۆبوونەوەکە، پرۆسەی نوێی ئاشتییە.
ئەمڕۆ کابینەی حکومەتی تورکیا بە سەرۆکایەتیی رەجەب تەیب ئەردۆغان کۆدەبێتەوە و لە کۆبوونەوەکەدا، چەندین بابەتی وەک دۆخی سوریا، شەڕی دژی تیرۆر و پاراستنی سنوورەکان، ئاگربەستی نێوان ئیسرائیل و حەماس و گەڕانەوەی ترامپ بۆ سەرۆکایەتی ئەمریکا گفتوگۆ دەکرێن.
بەپێی زانیارییەکان، یەکێک لەو بابەتانە، خەبات و هەوڵەکانی پرۆسەی نوێی ئاشتییە کە ئەردۆغان بە تورکیای بێ تیرۆر ناوی دەبات. دواجار، شاندی دەم پارتی بۆ دووەم کۆبوونەوە لەگەڵ عەبدوڵڵا ئۆجەلان، سەردانی وەزارەتی دادی تورکیایان کردبوو بەڵام هەتا ئێستا وەزارەت وەڵامی شاندەکەی نەداوەتەوە.
شاندی دەم پارتی، رۆژی ٢٨ی کانوونی ساڵی ٢٠٢٤ سەردانی زیندانی ئیمرالیان کردبوو و لەگەڵ عەبدوڵڵا ئۆجەلان کۆببوونەوە، دوای ئەوە شاندی ناوبراو لەگەڵ پارتە سیاسییەکانی ناو پەرلەمانی تورکیاش کۆببوونەوە. بە وتەی شرۆڤەکار و چاودێران، پێشبینی دەکرێت ئۆجەلان ئەمجارە داوای دانانی چەک و راگرتنی شەڕ لە پەکەکە بکات.