تورکیا کۆبانی و خاڵێکی هەسەدە‌ی لە قەرەقۆزاق کردە ئامانج و دوو چەکداری هەدەسە کوژران.
ڕوانگەی سووریا بۆ مافەکانی مرۆڤ بڵاویکردەوە، ئەمڕۆ بەیانی (دووشەمە ١٠ی شوباتی ٢٠٢٥)، فڕۆکەیەکی جەنگیی تورکیا گوندی قاسمیەی سەر بە گوندەوارەکانی کۆبانێی کردە ئامانج و ئاماژە بە زیانەکانی نەکراوە.
هەروەها بڵاویکردەوە، چیای قەسق و کێڵگەی شەهیدان و گوندی مەلحە بە توندی لەلایەن چەکدارانی سەر بە تورکیاوە تۆپباران کراون.
بەپێی ڕاپۆرتی ڕوانگه، فڕۆکەیەکی بێفڕۆکەوانی تورکیاش خاڵێکی سەربازیی هێزەکانی سوریای دیموکرات (هەسەدە)ی لە ئەنیی پردی قەرەقۆزاق کردە ئامانج و لە ئەنجامدا دوو چەکداری هەسەدە کوژران.
بەپێی ئامارەکانی ڕوانگەکە، لە ١٢ی کانوونی یەکەمی ساڵی ٢٠٢٤ەوە تا ئێستا ٦٠٥ کەس لە گوندەوارەکانی کۆبانی و منبج کوژراون و ٥٥ کەسیان خەڵکی مەدەنین.