مه‌سرور بارزانی، سه‌رۆكی حكومه‌تی هه‌رێمی كوردستان له لاپه‌ڕه‌ی خۆی له تۆڕی كۆمه‌ڵایه‌تی فه‌یسبووك راگه‌یاند، ئەمڕۆ پێشوازیمان لە بەڕێز بەریس ئیکینجی جێگری وەزیری دەرەوەی تورکیا و شاندێکی یاوەری کرد. وتیشی، بیروڕامان لەبارەی دەرفەتەکانی پەرەپێدانی پەیوەندیی دوولایەنە ئاڵوگۆڕ کرد ، بە تایبەتی لە بوارەکانی ئاڵوگۆڕی بازرگانی و وزەدا.
باسی له‌وه‌ش كرد، هاوڕابووین لەسەر پێویستیی دەستپێکردنەوەی هەناردەکردنی نەوتی هەرێمی کوردستان لە ڕێگەی بەندەری جەیهان، بە تایبەتی دوای پەسەندکردنی هەمواری یاسای بودجەی فیدراڵ لایەن ئەنجومەنی نوێنەرانەوە، تایبەت بە تێچووی دەرهێنان و گواستنەوەی نەوتی هەرێم .
هەروەها گفتوگۆمان لەبارەی پڕۆژەی ڕێگەی گەشەپێدان و بەستنەوەی وڵاتانی کەنداو و عێراق بە تورکیا و ئەوروپا لە ڕێگەی هێڵی ئاسنین کرد ، لەمبارەیەوە، جەختمان لە گرنگیی بەشداریی هەرێمی کوردستان لەم پڕۆژە ستراتیژییەدا کرد .
له كۆتاییدا روونی كرده‌وه، لە بەشێکی دیکەی کۆبوونەوەدا، گۆڕانکاریی و پێشهاتەکانی دۆخی سووریامان تاوتوێ کرد و پێویستیی پاراستنی ئاسایش و سەقامگیریی سووریا و دەستەبەرکردنی مافەکانی گەلی کورد و گشت پێکهاتەکانمان دووپات کردەوە.
