وه‌زیری دادى عێراق دانى پێدا ده‌نێت، له نێو گرتووخانه‌كانى عێراقدا ماده‌ى هۆشبه‌ر به‌كار ده‌هێنرێت و دووپاتی ده‌كاته‌وه، كه ناتوانن بردنه‌ژووره‌وه‌ى ماده‌ى هۆشبه‌ر بۆ نێو گرتووخانه‌كان، كۆنترۆڵ بكه‌ن.
خاليد شوانى، وه‌زیری دادى عێراق، له به‌رنامه‌یه‌كی ته‌له‌فزیۆنیدا له كه‌ناڵی (الشرقیه)، دان به‌وه‌دا ده‌نێت، له نێو گرتووخانه‌كانى عێراقدا، كه له‌ژێر ده‌سه‌ڵاتى وه‌زاره‌تی دادن، ماده هۆشبه‌ره‌كان به‌كار ده‌هێنرێت و ده‌ڵێت: “ئێمه تیمێكمان پێكهیبَناوه بۆ ڕێگریكردن له بردنه‌ژووره‌وه‌ى ماده‌ى هۆشبه‌ر بۆ نێو گرتووخانه‌كان كه له ده‌زگاى هه‌واڵگرى و ئاسایشی نیشتمانى و پۆلیسی فیدڕاڵی و وه‌زاره‌تى داد پێكهاتووه، به‌ڵام له‌گه‌ڵ ئه‌وه‌شدا له ڕێگه‌ى كه‌سوكارى زیندانیكراوه‌كانه‌وه، ماده‌ى هۆشبه‌ر ده‌بردرێته ژووره‌وه”.
سه‌باره‌ت به بردنه‌ژووره‌وه‌ى مۆبایل و ماده‌ى هۆشبه‌ر، دووپاتی كرده‌وه كه ئه‌وان ناتوانن به‌ته‌واوه‌تى كۆنترۆڵى ئه‌وه بكه‌ن و ڕێگرییان لێبكه‌ن، گوتی: “هۆكار زۆره، به‌ڵام كێشه‌ى گه‌وره ئه‌وه‌یه كه ناتوانین تۆڕى په‌یوه‌ندییه‌كان به‌ته‌واوه‌تى ڕابگرین، بۆیه میكانیزمێكى جیاوازمان دۆزیوه‌ته‌وه بۆ ئه‌و مه‌به‌سته و به شێوه‌یه‌كی ئه‌لیكترۆنی تۆڕى مۆبایله‌كان له ناو گرتووخانه‌كان بلۆك ده‌كه‌ین، ئه‌وه‌ش له چه‌ند مانگى داهاتوودا ده‌چێته وارى جێبه‌جێكردنه‌وه”.
به پێی زانیارى میدیا عێراقییه‌كان، كه به‌شێكیان له‌سه‌ر زارى ئه‌و كه‌سانه زانیارییان وه‌رگرتووه پێشتر زیندانی بوون و ئازاد كراون، له نێو گرتووخانه‌كانى عێراق به‌شێوه‌یه‌كی به‌رفراوان ماده‌ى هۆشبه‌ر به‌كار ده‌هێنرێت و مامه‌ڵه‌ى پێوه ده‌كرێت، ئه‌مه جگه له‌وه‌ى مۆبایل ده‌بردرێته ژووره‌وه هه‌رچه‌ند قه‌ده‌غه‌یه، له‌و چوارچێوه‌یه‌شدا ماوه‌یه‌ك پێش ئێستا له‌نێو گرتووخانه‌یه‌كی عێراق، چه‌ند زیندانیكراوێك گرته ڤیدیۆییان بڵاو كرده‌وه و ئه‌وه‌ش هه‌راى نایه‌وه.