مەکتەبی سیاسیی پارتی دیموکراتی کوردستان، بە بۆنەی جەژنی نەورۆز پەیامێكی بڵاو كردەوە و تێیدا ئاماژە بەوە دراوە: “هاتنی بەهار و جەژنی نەورۆز، هاندەر و بزوێنەری گیانی ئازادیخوازی و ڕزگارییە.”
ئەمڕۆ پێنجشەممە 20/3/2025، مەکتەبی سیاسیی پارتی دیموکراتی کوردستان، بە بۆنەی جەژنی نەورۆز پەیامێكی بڵاو كردەوە و تێیدا هاتووە: “ب ەبۆنەی هاتنەوەی جەژنی نەتەوەیی نەورۆز و سەری ساڵی نوێی کوردی، گەرمترین پیرۆزبایی لە گەلە خۆڕاگرەکەمان دەکەین، پیرۆزبایی تایبەت لە هەموو کوردێکی دڵسۆز لە هەر شوێنێکی دونیا بێت دەکەین، جەژن لە خانەوادە و کەسوکاری سەربەرزی شەهیدە نەمرەکان و تەواوی کوردستانیان و هێزی پێشمەرگەی کوردستان پیرۆز دەکەین.”
ئەوەش خراوەتە ڕوو: “نەورۆز، هەوێنی نەسرەوتن و بەردەوامبوونە لەسەر ڕێچکە و ڕەوتی تێکۆشان و ڕەتکردنەوەی زوڵم و زۆرداری.”
دەقی پەیامەكەی مەکتەبی سیاسیی پارتی دیموکراتی کوردستان:
پەیامی پیرۆزبایی مەکتەبی سیاسیی پارتی دیموکراتی کوردستان بە بۆنەی سەری ساڵی نوێی کوردی و جەژنی نەتەوەیی نەورۆز
بەبۆنەی هاتنەوەی جەژنی نەتەوەیی نەورۆز و سەری ساڵی نوێی کوردی گەرمترین پیرۆزبایی لە گەلە خۆڕاگرەکەمان دەکەین، پیرۆزبایی تایبەت لە هەموو کوردێکی دڵسۆز لە هەر شوێنێکی دنیابێ دەکەین و، جەژن لە خانەوادە و کەسوکاری سەربەرزی شەهیدە نەمرەکان و تەواوی کوردستانیان و هێزی پێشمەرگەی کوردستان پیرۆز دەکەین.
کەلتووری نەتەوەییمان لە ڕەوتاری مێژوویی خۆیدا خاوەن شوناسی راستەقینە و تایبەتمەندێتی خۆیەتی و تا بە ئەمڕۆش دەگات ئەو نەریتەی پەرەپێداوە و پاراستوویەتی شانبەشانی شوناسی ڕەسەنی نەتەوەیی و ڕەگەزە نەتەوەییەکانی دیکە، دیارە نەورۆزیش یەکێکە لەو نەریتە ڕەگاژۆییەی نێو مێژووی بوون و مانەوەی گەلەکەمان.
لەسەرینی ئەمەوە یادی جەژنی نەتەوەیی نەورۆز و سەری ساڵی نوێی کوردی (٢٧٢٥)ی ئەمساڵیش لە نێو دیرۆک و کەلتووری کوردەواریدا وەک نەریتێکی دێرین و هەمیشە زیندوو و گرنگە، نەورۆز وەک هەمیشە نیشانەی بووژانەوە و سرووشبەخشی نوێبوونەوەی سرووشت بووە. هەروەها هەوێنی نەسرەوتن و بەردەوامبوونە لەسەر ڕێچکە و ڕەوتی تێکۆشان و ڕەتکردنەوەی زوڵم و زۆرداری.
هاتنی بەهار و جەژنی نەورۆز، هاندەر و بزوێنەری گیانی ئازادیخوازی و ڕزگارییە، هێمای یەکبوون و ڕابوونە، نیشانەی ڕۆژێکی نوێیە لە سەرتاسەری کوردستان، بۆیە ئەو بۆنە جەماوەرییە بە دەرفەتێک دەزانین بۆ ڕێکخستنەوەی نێو ماڵی ناوخۆ و هاماهەنگی زیاتر و لێکنزیکبوونەوەی هێز و لایەنە سیاسییەکان بۆ یەکخستنی گوتاری سیاسی و هەوڵدان بۆ چارەسەرکردنی کێشە و گیروگرفتەکان.
هیوادارین بۆ لەمەودواش هەموو لایەک بە هێز و گیانی بەرپرسیاریەتی کار بکەین و بەرژەوەندی باڵای نەتەوەیی و نیشتمانی کاری لەپێشینەی خیتابی سیاسیمان بێ بۆ یەکلاکردنەوەی پرسە چارەنووسسازەکان و پێکهێنانی کابینەی دەیەمی حکوومەتی هەرێم و پاراستنی قەوارەی شەرعی هەرێم و دەستکەوتەکانمان.
ئەو بۆنە پیرۆزە هاوکاتە لەگەڵ یادەکانی ڕاپەڕین و ڕۆژی ئازادکردنی شاری کەرکووکی دڵی کوردستان، بەو بۆنە گرنگەوە پیرۆزباییەکی گەرم لە هاووڵاتییان و خەڵکی سەربەرزی شاری کەرکووک دەکەین و هیوای سەرفرازی و ئاسوودەییان بۆ دەخوازین.
جارێکی دیکە نەورۆز و ساڵی نوێی کوردی پیرۆز و، کوردستانیش هەمیشە ئاوەدان و شکۆدار بێت.
مەکتەبی سیاسیی پارتی دیموکراتی کوردستان
نەورۆزی٢٧٢٥ی کوردی
٢١ی ئاداری ٢٠٢٥زایینی